IND vs ENG TEST: ભારતની પ્રથમ ઇનિંગ 471 રને સમેટાઇ, છેલ્લા 41 રનમાં 7 વિકેટો ગુમાવી

IND vs ENG TEST: ભારતની પ્રથમ ઇનિંગ 471 રને સમેટાઇ, છેલ્લા 41 રનમાં 7 વિકેટો ગુમાવી

IND vs ENG TEST: લીડ્સના હેડિંગ્લે ક્રિકેટ સ્ટેડિયમમાં 20 જૂનથી રમાઈ રહેલી ભારત અને ઇંગ્લેન્ડ વચ્ચેની પ્રથમ ટેસ્ટની પ્રથમ ઇનિંગમાં ભારતીય ક્રિકેટ ટીમ બીજા દિવસે(21 જૂન) 471 રને ઓલઆઉટ થઈ. ભારત તરફથી ઓપનર યશસ્વી જયસ્વાલ (101), કેપ્ટન શુભમન ગિલ (147) અને ઋષભ પંતે (134) સદી ફટકારી હતી. જો કે 430ના સ્કોર પર શુભમન ગિલની ચોથી વિકેટ પડ્યા બાદ ભારતે બાકીની તમામ 6 વિકેટ 41 રનના ટૂંકા ગાળામાં ગુમાવી દેતાં ટીમનો ધબડકો થયો હતો. મેચમાં ઇંગ્લેન્ડની ટીમે ટોસ જીતીને ભારતને પ્રથમ બેટિંગ આપી હતી જે નિર્ણય ઘણા અંશે ભારતની તરફેણમાં રહ્યો હતો.

ઋષભ પંતની રેકોર્ડતોડ સદી: ઋષભ પંતે સિક્સર સાથે ધમાકેદાર સદી ફટકારી છે. પંતે 146 બોલમાં 100 રન બનાવ્યા છે. તેમણે સદી સુધી પહોંચવા માટે 146 બોલ રમી, જેમાં 10 ફોર અને 4 સિક્સર સામેલ છે. આ સાથે પંતે મહેન્દ્ર સિંહ ધોનીનો રેકોર્ડ તોડ્યો છે. પંત ટેસ્ટ ક્રિકેટમાં 7 સદી ફટકારનારો પ્રથમ ભારતીય વિકેટકીપર બન્યો છે. ઇંગ્લેન્ડ વિરૂદ્ધ તેમની ચોથી ટેસ્ટ સદી છે.

પંતની આ સદી તેમને વિદેશની ધરતી પર સૌથી વધુ ટેસ્ટ સદી લગાવનારા વિકેટકીપર બેટરની યાદીમાં સંયુક્ત રીતે ત્રીજા નંબરે લાવી છે. તેમની આ ઇનિંગ ન માત્ર ભારતીય ફેન્સ માટે ગૌરવની ક્ષણ છે, પરંતુ ટેસ્ટ ક્રિકેટમાં તેમના આત્મવિશ્વાસનું પણ પ્રમાણ છે. લીડ્સની પિચ પર ઇંગ્લેન્ડના બોલરોની સામે પંતે પોતાના આક્રામક શૈલીને યથાવત્ રાખી. તેમની ઈનિંગમાં તેજ તર્રાર શોટ્સ અને સમજદારીથી રમત રમવાનું શાનદાર મિશ્રણ જોવા મળ્યું.

કરુણ નાયરને આઠ વર્ષની તપસ્યા પર પાણી ફરી ગયું, જ્યારે ઇંગ્લેન્ડ સામે તે ચોથા બોલમાં જ પોતાની વિકેટ ગુમાવી બેઠો અને ખાતું ખોલાવ્યા વગર જ પેવેલિયન તરફ ચાલતો થયો. લીડ્સ ટેસ્ટના બીજા દિવસે બેન સ્ટોક્સના બોલ પર ઓલી પોપે એક શાનદાર કેચ ઝડપી લીધો, જેને કરુણ નાયર આખી જિંદગી ભૂલી શકશે નહીં.

3007 દિવસ બાદ કરી હતી વાપસી

કરુણ નાયરે પોતાની છેલ્લી ટેસ્ટ મેચ 3007 દિવસ પહેલા એટલે કે 2016માં ઓસ્ટ્રેલિયા સામે રમી હતી. હવે આઠ વર્ષ બાદ પોતાની વાપસી પર તે 0 રને આઉટ થઈ ગયો. ઇંગ્લેન્ડના કેપ્ટન બેન સ્ટોક્સે ઓફ સ્ટમ્પ બહાર એક ફૂલ આઉટસ્વિંગ બોલ ફેંક્યો. 33 વર્ષીય બેટ્સમેન તેના પર કવર ડ્રાઇવ રમવા માગતો હતો. પરંતુ શોટ ટાઇમ કરી શક્યો નહીં અને ઓલી પોપે શાનદાર ડાઇવ લગાવી કેચ ઝડપી લીધો.

વિકેટકીપર તરીકે સૌથી વધુ સદી ફટકારનારા ભારતીય ખેલાડીઓનું લિસ્ટ:

રિષભ પંત- 7
મહેન્દ્ર સિંહ ધોની- 6
રિદ્ધિમાન સાહા- 3

શુભમનના ટેસ્ટ કરિયરની છઠ્ઠી સદી: ટેસ્ટ કેપ્ટન બન્યા બાદ શુભમન ગિલનો આ પહેલો મુકાબલો છે. તેવામાં તેમની આ સદી યાદગાર રહેશે. શુભમન પૂર્વ કપ્તાન વિરાટ કોહલીની નિવૃત્તને લઈને પહેલીવાર ટેસ્ટ ક્રિકેટમાં ચોથા નંબર પર બેટિંગ કરવા ઉતર્યા હતા. ટેસ્ટના પહેલા જ દિવસે શુભમને સદી ફટકારી હતી.

સુદર્શનને ટેસ્ટ કેપ ચેતેશ્વર પુજારાએ સોંપી. સુદર્શન ભારત તરફથી ટેસ્ટ રમનારા 317માં ખેલાડી છે. જોકે, 23 વર્ષીય સાઇ સુદર્શન પોતાની ડેબ્યૂ ઇનિંગમાં કંઈ ખાસ કમાલ ન કરી શક્યો. સાઇએ માત્ર 4 બોલ રમ્યા અને શૂન્ય પર આઉટ થયો. સુદર્શને લેગ-સ્ટમ્પના બોલ પર ફ્લિક શોટ રમવાનો પ્રયાસ કર્યો. શોટનું ટાઈમિંગ બરાબર ન રહ્યું અને બોલ સાઈડમાંથી પસાર સ્મિથની જમણી તરફ ગઈ, જ્યાં તેમણે કેચ પકડી લીધો.