IND vs ENG 3rd T20: મેચ જીતી સિરિઝ ભારતના નામે કરવા ઉતરશે ટીમ ઇન્ડિયા

IND vs ENG 3rd T20: મેચ જીતી સિરિઝ ભારતના નામે કરવા ઉતરશે ટીમ ઇન્ડિયા

ભારત અને ઈંગ્લેન્ડ વચ્ચે રમાઈ રહેલી પાંચ મેચની T20 આંતરરાષ્ટ્રીય શ્રેણી રોમાંચક તબક્કામાં પ્રવેશી ગઈ છે. ભારતે પ્રથમ T20 મેચમાં ઈંગ્લેન્ડને 7 વિકેટે અને બીજી મેચમાં 2 વિકેટથી હરાવીને શ્રેણીમાં 2-0ની લીડ મેળવી લીધી છે. આવી સ્થિતિમાં ભારતીય ટીમ મંગળવારે રાજકોટમાં ઈંગ્લેન્ડ સામે મેદાનમાં ઉતરશે ત્યારે તેની નજર સતત ત્રીજી જીત સાથે સિરીઝ પર કબજો કરવા પર હશે, જ્યારે તેનાથી વિપરીત, ઇંગ્લેન્ડની ટીમ તેની ભૂતકાળની ભૂલોમાંથી બોધપાઠ લેશે. અને સૂર્ય કુમાર યાદવ અને કંપની પર દબાણ કરીને વિજય નોંધાવવા આતુર રહેશે

જોકે, અત્યાર સુધી રમાયેલી બે મેચમાં શાનદાર બેટિંગ જોવા મળી છે, પરંતુ બંને ટીમમાંથી કોઈ પણ ખેલાડી સદી ફટકારી શક્યો નથી. ભારત અને ઈંગ્લેન્ડ વચ્ચે 28 જાન્યુઆરીએ રાજકોટમાં ત્રીજી T20 ઈન્ટરનેશનલ મેચ રમાવાની છે. આવી સ્થિતિમાં, ચાલો આપણે તે બે ક્રિકેટરો પર ધ્યાન કેન્દ્રિત કરીએ જેમણે રાજકોટમાં આ ફોર્મેટમાં શાનદાર સદી ફટકારી છે.

સૂર્યકુમાર યાદવ-
T20 આંતરરાષ્ટ્રીય ક્રિકેટમાં રાજકોટમાં સદી ફટકારનાર સૂર્યકુમાર યાદવ એકમાત્ર ભારતીય બેટ્સમેન છે. સૂર્યકુમાર યાદવે વર્ષ 2023માં શ્રીલંકા સામે આ સિદ્ધિ મેળવી હતી. તેની આક્રમક બેટિંગના કારણે જ ભારતીય ટીમે શ્રીલંકા સામે શાનદાર જીત નોંધાવી હતી. સૂર્યકુમાર યાદવની તોફાની સદીની મદદથી ભારતે શ્રીલંકા સામે પાંચ વિકેટે 228 રનનો વિશાળ સ્કોર બનાવ્યો હતો જેના જવાબમાં શ્રીલંકા 16.4 ઓવરમાં 137 રનમાં ઓલઆઉટ થઈ ગઈ હતી. ભારતે આ મેચ 91 રને જીતી લીધી હતી. આ મેચમાં સૂર્યકુમાર યાદવે 51 બોલમાં 112 રનની ઇનિંગ રમી હતી, જેમાં તેણે 7 ફોર અને 9 સિક્સર ફટકારી હતી.
જો આપણે ઈંગ્લેન્ડ સામેની વર્તમાન T20 ઈન્ટરનેશનલ સીરીઝની છેલ્લી બે મેચો પર નજર કરીએ તો સૂર્યકુમાર યાદવનું બેટ સાથે પ્રદર્શન સારું રહ્યું નથી. કોલકાતામાં ઈંગ્લેન્ડ સામે રમાયેલી પ્રથમ T20 મેચમાં તે પોતાનું ખાતું પણ ખોલી શક્યો ન હતો, જ્યારે ચેન્નાઈમાં તે માત્ર 12 રન બનાવીને પેવેલિયન પરત ફર્યો હતો. આવી સ્થિતિમાં T-20 આંતરરાષ્ટ્રીય ક્રિકેટમાં અત્યાર સુધી ચાર સદી ફટકારનાર ભારતીય કેપ્ટન પર રાજકોટમાં ફરી એકવાર મોટી ઇનિંગ્સ રમવાનું દબાણ રહેશે.

ભારતીય ક્રિકેટ ચાહકો પણ તેની પાસેથી મોટી ઇનિંગની અપેક્ષા રાખી રહ્યા છે, કારણ કે છેલ્લી વખત તેણે ગયા વર્ષે ઓક્ટોબરમાં હૈદરાબાદમાં બાંગ્લાદેશ સામે અડધી સદી ફટકારી હતી. તે મેચમાં તેણે 35 બોલમાં 8 ચોગ્ગા અને 5 છગ્ગાની મદદથી શાનદાર 75 રન બનાવ્યા હતા. ત્યારથી, સૂર્યકુમાર યાદવે કુલ છ T20 આંતરરાષ્ટ્રીય મેચ રમી છે અને તે માત્ર 38 રન જ બનાવી શક્યો છે.
કોલિન મુનરો-
ન્યુઝીલેન્ડનો કોલિન મુનરો રાજકોટમાં T20 આંતરરાષ્ટ્રીય ક્રિકેટમાં સદી ફટકારનાર પ્રથમ બેટ્સમેન છે. તેણે નવેમ્બર 2017માં ભારત સામે આ કારનામું કર્યું હતું. કોલિન મુનરોની વિસ્ફોટક સદીની મદદથી ન્યૂઝીલેન્ડે નિર્ધારિત 20 ઓવરમાં 2 વિકેટ ગુમાવીને 196 રન બનાવ્યા હતા, જેના જવાબમાં ભારતીય ટીમ 20 ઓવરમાં 7 વિકેટે 156 રન બનાવી શકી હતી. આ મેચમાં ભારતને 40 રનથી હારનો સામનો કરવો પડ્યો હતો. આ મેચમાં કોલિન મુનરોએ 58 બોલમાં સાત ચોગ્ગા અને સાત છગ્ગાની મદદથી 109 રનની અણનમ ઇનિંગ રમી હતી..