IND VS AUS - સિડનીની પીંચમા 3 દિવસમાં 36 વિકેટ પડી છતા પીચને લઇ ICC એ શું ક્હ્યુ વાંચો

IND VS AUS – સિડનીની પીંચમા 3 દિવસમાં 36 વિકેટ પડી છતા પીચને લઇ ICC એ શું ક્હ્યુ વાંચો

સિડનીઃ ભારત અને ઓસ્ટ્રેલિયા વચ્ચેની બોર્ડર ગાવસ્કર ટ્રોફીમાં પાંચમાંથી ચાર પીચને ICC દ્વારા ‘ઉત્તમ’ રેટ કરવામાં આવી છે, જ્યારે સિડનીમાં પાંચમી અને અંતિમ ટેસ્ટની પિચને ‘સંતોષકારક’ રેટિંગ મળ્યું છે. ક્રિકેટ ઓસ્ટ્રેલિયાએ બુધવારે આ જાણકારી આપી. ઓસ્ટ્રેલિયાએ પાંચ મેચોની શ્રેણી 3-1થી જીતી અને વર્લ્ડ ટેસ્ટ ચેમ્પિયન્સ ફાઈનલ માટે પણ ક્વોલિફાય કર્યું. ક્રિકેટ ઓસ્ટ્રેલિયાએ એક રિલીઝમાં જણાવ્યું છે કે પર્થના ઓપ્ટસ સ્ટેડિયમ, એડિલેડ ઓવલની પીચો, બ્રિસ્બેનની ગાબા પિચ અને મેલબોર્ન ક્રિકેટ ગ્રાઉન્ડની પીચોને ઉચ્ચ રેટિંગ્સ મળ્યા છે. જ્યારે સિડની ક્રિકેટ ગ્રાઉન્ડની પીચને ‘સંતોષકારક’ ગણાવી છે.

સિડનીની પીચ આ વખતે બોલરોને મદદરૂપ હતી અને બેટ્સમેન બંને ઇનિંગ્સમાં સંઘર્ષ કરતા જોવા મળ્યા હતા. ક્રિકેટ ઓસ્ટ્રેલિયાના ક્રિકેટ ઓપરેશનના વડા પીટર રોચે જણાવ્યું હતું કે, ‘અમે હંમેશા એવી પીચો તૈયાર કરવાનો પ્રયાસ કરીએ છીએ જે તે મેદાનના ગુણોને પ્રતિબિંબિત કરે છે અને ઓસ્ટ્રેલિયન ક્રિકેટમાં આવું બન્યું છે.’

તેણે કહ્યું, ‘અમે યજમાન ટીમને અનુકૂળ હોય તેવી પીચો તૈયાર કરતા નથી કે અમને મદદ કરે. અમે ઈચ્છીએ છીએ કે બેટ અને બોલ વચ્ચે સારી સ્પર્ધા થાય અને પરિણામ આવે. તૈયારીઓ હવામાનથી પ્રભાવિત થઈ હતી અને અમે જાણીએ છીએ કે અત્યંત કુશળ ક્યુરેટર્સ પણ પ્રતિકૂળ હવામાનથી પ્રભાવિત થયા હશે. સિડની પિચ અંગે સુનિલ ગાવસ્કરે કહ્યું કે તે આદર્શ પિચ નથી, ભારતીય કોચ ગૌતમ ગંભીરે તેને ‘મસાલેદાર’ અને ટેસ્ટ ક્રિકેટ માટે સારી ગણાવી હતી.

વર્લ્ડ ટેસ્ટ ચેમ્પિયનશિપની ફાઇનલમાં ઓસ્ટ્રેલિયાનો સામનો દક્ષિણ આફ્રિકા સામે થશે. દક્ષિણ આફ્રિકાની ટીમે બે મેચની શ્રેણીમાં પાકિસ્તાનને હરાવીને ફાઇનલમાં પોતાનું સ્થાન નિશ્ચિત કરી લીધું છે. WTCની ફાઇનલ મેચ 11 થી 15 જૂન દરમિયાન ઇંગ્લેન્ડના લોર્ડ્સ ક્રિકેટ ગ્રાઉન્ડમાં રમાશે. આવી સ્થિતિમાં બંને ટીમો વચ્ચેની આ ફાઇનલ મેચ ઘણી રોમાંચક બની રહેશે.