Related Posts
Category : Sports
પહલગામમાં આંતકી ઘટના થતા IPL ને લઇ BCCIએ કર્યો મોટો નિર્ણય
જમ્મુ અને કાશ્મીરના પહેલગામમાં થયેલા આતંકવાદી હુમલાએ સમગ્ર દેશને હચમચાવી નાખ્યો છે. 22 એપ્રિલના રોજ, આતંકવાદીઓએ બૈસરન વિસ્તારમાં પ્રવાસીઓ પર અંધાધૂંધ ગોળીબાર કર્યો, જેમાં 26 લોકો માર્યા ગયા અને ઘણા લોકો ઘાયલ થયા. આ પીડાદાયક આતંકવાદી હુમલા બાદ દેશભરમાં શોકનું મોજુ ફરી વળ્યું છે. કેન્દ્રીય ગૃહમંત્રી અમિત શાહ તાત્કાલિક કાશ્મીર પહોંચ્યા અને પરિસ્થિતિનો તાગ મેળવ્યો. આ દરમિયાન, વડા પ્રધાન નરેન્દ્ર મોદીએ સાઉદી અરેબિયાનો પ્રવાસ અધવચ્ચે જ છોડીને સ્વદેશ પાછા ફરવાનો નિર્ણય કર્યો.
BCCI એ મોટું પગલું ભર્યું
આ હુમલાની અસર રમતગમતની દુનિયા પર પણ પડી છે. BCCI એ IPL 2025 ને લઈને એક મહત્વપૂર્ણ નિર્ણય લીધો છે. જ્યારે સનરાઇઝર્સ હૈદરાબાદ અને મુંબઈ ઇન્ડિયન્સ IPL ની 18મી સીઝનની 41મી મેચમાં એકબીજા સામે ટકરાશે, ત્યારે બંને ટીમોના ખેલાડીઓ કાળી પટ્ટી પહેરીને મેદાનમાં ઉતરશે. આ મેચમાં ન તો ચીયરલીડર્સ પરફોર્મ કરશે અને ન તો કોઈ ફટાકડા ફોડશે. આ ઉપરાંત, આતંકવાદી હુમલામાં માર્યા ગયેલા લોકોને શ્રદ્ધાંજલિ આપવા માટે મેચ શરૂ થાય તે પહેલાં એક મિનિટનું મૌન પાળવામાં આવશે.
બીસીસીઆઈના એક સૂત્રએ પીટીઆઈને જણાવ્યું હતું કે બંને ટીમોના ખેલાડીઓ કાળી પટ્ટી પહેરીને રમશે અને કાશ્મીરના પહેલગામમાં થયેલા આતંકવાદી હુમલામાં જીવ ગુમાવનારાઓની યાદમાં એક મિનિટનું મૌન પાળશે. તેમણે કહ્યું કે મુંબઈ ઈન્ડિયન્સ અને સનરાઈઝર્સ હૈદરાબાદ વચ્ચેની મેચમાં કોઈ ચીયરલીડર્સ નહીં હોય અને કોઈ ફટાકડા ફોડવામાં નહીં આવે.
આતંકવાદી હુમલાને લઈને સમગ્ર દેશમાં આક્રોશ છે
પાકિસ્તાનના આતંકવાદી સંગઠન લશ્કર-એ-તૈયબાના સહયોગી રેઝિસ્ટન્સ ફ્રન્ટ (TRF) એ પહેલગામમાં થયેલા આ આતંકવાદી હુમલાની જવાબદારી સ્વીકારી છે. આ હુમલાની દેશ અને વિદેશમાં મોટા પાયે નિંદા થઈ રહી છે. આ હુમલાને લઈને સમગ્ર દેશમાં ગુસ્સો છે અને ઘણા શહેરોમાં વિરોધ પ્રદર્શનો થઈ રહ્યા છે. ઉલ્લેખનીય છે કે આ પહેલા પણ 2008ના મુંબઈ હુમલા બાદ ભારતે પાકિસ્તાન સાથે ક્રિકેટ સંબંધો તોડી નાખ્યા હતા. તાજેતરમાં, ભારતે ચેમ્પિયન્સ ટ્રોફી માટે પાકિસ્તાનનો પ્રવાસ કરવાનો ઇનકાર કર્યો હતો, જેના કારણે ICC ને ટુર્નામેન્ટ માટે તટસ્થ સ્થળની વ્યવસ્થા કરવાની ફરજ પડી હતી. આગામી ICC ટુર્નામેન્ટમાં પણ બંને ટીમો તટસ્થ સ્થળોએ રમતી જોવા મળશે.
Load more
