નીતિન નવીન આજે સંભાળશે રાષ્ટ્રીય અધ્યક્ષનો કાર્યભાર બિહારમાં પાચ વખત ધારાસભ્ય રહી ચુક્યા છે

નીતિન નવીન આજે સંભાળશે રાષ્ટ્રીય અધ્યક્ષનો કાર્યભાર બિહારમાં પાચ વખત ધારાસભ્ય રહી ચુક્યા છે

26 વર્ષની ઉંમરે ભાજપની યુવા પાંખમાં જોડાવાથી લઈને ધારાસભ્ય બનવા સુધી અને હવે 45 વર્ષની ઉંમરે ભાજપ અધ્યક્ષ બનવા સુધીની સફર નીતીન નવીન માટે ઉતાર ચઠાવ ભરી રહી છે. સોમવારે રાષ્ટ્રીય અધ્યક્ષ તરીકે બિનહરીફ ચૂંટાયા બાદ, નીતિન નવીન પાર્ટીના સૌથી યુવા પ્રમુખ બનશે. નીતિન નવીનની પદોન્નતિ ભાજપમાં પેઢીગત પરિવર્તનનું પણ સૂચક છે. નવીન જેપી નડ્ડાનું સ્થાન લેશે, જેઓ 2020 થી આ પદ સંભાળી રહ્યા છે. કાયસ્થ સમુદાયના નવીનને અગાઉ 14 ડિસેમ્બરે ભાજપના કાર્યકારી પ્રમુખ તરીકે નિયુક્ત કરવામાં આવ્યા હતા.સોમવારે, વડા પ્રધાન નરેન્દ્ર મોદી અને ભાજપના અન્ય વરિષ્ઠ નેતાઓએ નીતિન નવીનના સમર્થનમાં ઉમેદવારી પત્રો ભર્યા હતા, જેમને મંગળવારે ઔપચારિક રીતે ભાજપ પ્રમુખ તરીકે જાહેર કરવામાં આવશે. બિહારના પાંચ વખત ધારાસભ્ય રહેલા નીતિન નવીન જ ટોચના પક્ષના પદ માટે એકમાત્ર ઉમેદવાર હતા. વડા પ્રધાન મોદી ઉપરાંત, પક્ષના પ્રમુખ જેપી નડ્ડા અને કેન્દ્રીય મંત્રીઓ અમિત શાહ, રાજનાથ સિંહ અને નીતિન ગડકરી સહિત અનેક વરિષ્ઠ નેતાઓએ તેમને પ્રસ્તાવિત કર્યા હતા. ઉમેદવારી પત્રોના 37 સેટમાંથી, 36 પાર્ટીના રાજ્ય એકમો દ્વારા દાખલ કરવામાં આવ્યા હતા અને એક સેટ ભાજપ સંસદીય પક્ષ દ્વારા રજૂ કરવામાં આવ્યો હતો.

એક રસપ્રદ સંયોગ એ છે કે ભારતીય જનતા પાર્ટીની સ્થાપના ૧૯૮૦ માં થઈ હતી, એ જ વર્ષે નવીનનો જન્મ થયો હતો. સામાન્ય રીતે શાંત વ્યક્તિત્વ ધરાવતા, નવીન બિહારથી પાંચ વખત ધારાસભ્ય રહ્યા છે અને રાજ્યના જાહેર બાંધકામ વિભાગ (PWD) મંત્રી તરીકે પણ સેવા આપી છે. ૨૬ વર્ષની ઉંમરે, તેમને તેમના પિતા, પાર્ટીના અનુભવી નેતા, નવીન કિશોર સિંહાના મૃત્યુથી ખાલી પડેલી પટના પશ્ચિમ વિધાનસભા બેઠક પરથી મેદાનમાં ઉતારવામાં આવ્યા હતા. ત્યારથી, લગભગ બે દાયકા દરમિયાન, નવીન બાંકીપુરથી સતત પાંચ વખત જીત્યા છે.નવીનને રાજકારણમાં પ્રવેશવા માટે પોતાનો અભ્યાસ અધવચ્ચે જ છોડી દેવો પડ્યો. શરૂઆતમાં, તેમને રાજકીય દ્રશ્યથી બહારના વ્યક્તિ તરીકે જોવામાં આવતા હતા. કાર્યકારી પ્રમુખ તરીકે નિયુક્ત થયા પછી, સરળ સ્વભાવના નવીન ઝડપથી મેદાનમાં ઉતર્યા, જે આ વર્ષે તમિલનાડુ, કેરળ અને આસામ સહિત અનેક વિધાનસભા ચૂંટણીઓમાં પાર્ટીનું નેતૃત્વ કરશે. ભાજપના રાષ્ટ્રીય કાર્યકારી પ્રમુખ તરીકે તેમનું નામ જાહેર થયાના ઘણા સમય પહેલા, નવીને એક કાર્યક્રમમાં કહ્યું હતું કે તેઓ પાર્ટીના કાર્યકરોને નમન કરે છે જેમની મહેનત ઘણા નીતિન નવીન બનાવે છે.