આંદોલન કરી આપણે આનંદીબેન પટેલ જેવા સારા સીએમ ગુમાવ્યું દુખ – દિનેશ બાંભણીયા

By: Nation Gujarat Team
17 Nov, 2026

Gujarat Politics: ગુજરાતમાં આગામી ચૂંટણીઓ પહેલા જ્ઞાતિગત રાજકારણનો ચક્રવ્યૂહ ફરી એકવાર સક્રિય થઈ રહ્યો છે. તાજેતરમાં કોળી સમાજના મુખ્યમંત્રી હોવા અંગે પબુભા માણેકના નિવેદન બાદ રાજકારણ ગરમાયું હતું, ત્યારે જસદણ પાટીદાર શૈક્ષણિક સંકુલના કાર્યક્રમમાં પાટીદાર આંદોલનના સમયના અગ્રણી દિનેશ બાંભણિયાએ આપેલા નિવેદને રાજકીય વર્તુળોમાં ભારે ચર્ચા જગાવી છે. તેમણે જાહેરમાં પૂર્વ મુખ્યમંત્રી આનંદીબેન પટેલના રાજીનામાને લઈને અફસોસ વ્યક્ત કર્યો હતો.

જસદણમાં પાટીદાર મંચ પરથી દિનેશ બાંભણિયાનું મોટું નિવેદન

જસદણના કાર્યક્રમમાં પૂર્વ મુખ્યમંત્રી આનંદીબેન પટેલનાં પુત્રી અનારબેન પટેલની વિશેષ ઉપસ્થિતિ રહી હતી. મંચ પરથી સંબોધન કરતી વખતે દિનેશ બાંભણિયા ભાવુક બન્યા હતા અને જાહેરમાં પ્રાયશ્ચિત કરતા જણાવ્યું હતું કે, પાટીદાર આંદોલનના બહાને આપણે એક સારા મુખ્યમંત્રી ગુમાવ્યા છે. તેમણે સ્પષ્ટ શબ્દોમાં સ્વીકાર કર્યો હતો કે પાટીદાર મુખ્યમંત્રી આનંદીબેનને હટાવીને પાટીદાર સમાજને મોટું નુકસાન થયું છે અને હવે પછી કોઈ પાટીદાર મુખ્યમંત્રી સાથે આવું ન થવું જોઈએ. તેમણે આંદોલન સમયની પરિસ્થિતિ માટે જાહેરમાં માફી પણ માંગી હતી.

અનારબેન પટેલે કહ્યું ‘મમીના હૃદયમાં કોઈ રંજ નથી’

દિનેશ બાંભણિયાના આ નિવેદન અને જાહેર પ્રાયશ્ચિત બાદ મંચ પર ઉપસ્થિત અનારબેન પટેલે અત્યંત સહજતાથી આ વાતનો સ્વીકાર કર્યો હતો. તેમણે પ્રતિક્રિયા આપતા સ્પષ્ટ શબ્દોમાં જણાવ્યું હતું કે, હવે કોઈએ પણ મનમાં દુઃખ રાખવાની જરૂર નથી અને મમીના હૃદયમાં આ બાબતે કોઈ જ રંજ કે નારાજગી નથી. દિનેશ બાંભણિયાના આ ખુલ્લા સ્વીકાર અને અનારબેનના હકારાત્મક પ્રતિસાદથી રાજકીય ક્ષેત્રે નવા તર્ક-વિતર્કો શરૂ થઈ ગયા છે.

પબુભા માણેકના નિવેદનથી ગુજરાતના રાજકારણમાં ગરમાવો

ઉલ્લેખનીય છે કે, ગઈકાલે નવરંગ માંડવાના કાર્યક્રમમાં સંબોધન કરતા પબુભા માણેકે કોળી સમાજની વસ્તી અને તાકાતનો ઉલ્લેખ કરતા જણાવ્યું હતું કે, “ગુજરાત રાજ્યમાં વસ્તીની દ્રષ્ટિએ બીજા નંબરે કોળી સમાજ આવે છે, તેથી રાજ્યના મુખ્યમંત્રી (Chief Minister) પણ તમારા સમાજના હોવા જોઈએ.” આ સાથે જ તેમણે સમાજમાં સામાજિક જાગૃતિ (Social Awareness) નો અભાવ હોવાનો સૂચિતાર્થ પણ વ્યક્ત કર્યો હતો. પબુભા માણેકનું આ નિવેદન વાયુવેગે ફેલાતા જ રાજ્યના રાજકીય વર્તુળોમાં જ્ઞાતિવાદ અને સત્તાના સમીકરણો પર ચર્ચાઓ તેજ બની ગઈ છે.

ચૂંટણી પહેલાં પાટીદાર સમાજ એક

આમ, પાટીદાર આંદોલનના વર્ષો બાદ દિનેશ બાંભણિયાએ આનંદીબેન પટેલના રાજીનામાને લઈને જાહેરમાં વ્યક્ત કરેલો અફસોસ ફરી એકવાર ગુજરાતના રાજકારણમાં ચર્ચાનો વિષય બન્યો છે. એક તરફ બાંભણિયાએ જૂની ભૂલનો સ્વીકાર કરી માફી માગી, તો બીજી તરફ અનાર પટેલે મનમાં કોઈ કડવાશ ન હોવાની વાત કહી મામલો હળવો કરવાનો પ્રયાસ કર્યો. હવે સવાલ એ છે કે ચૂંટણી પહેલાં પાટીદાર સમાજના આ જૂના મુદ્દાને લઈને રાજકીય ચર્ચા કઈ દિશામાં આગળ વધે છે?


Related Posts

Load more
Follow Us

Live Cricket Score