દીકરી છે, કન્યાદાન કરીશ કહીને 3 વર્ષ સુધી રેપ કર્યો‘:બદનામીનો ડર બતાવ્યો

દીકરી છે, કન્યાદાન કરીશ કહીને 3 વર્ષ સુધી રેપ કર્યો‘:બદનામીનો ડર બતાવ્યો

‘પહેલી વાર મળી, ત્યારે તેણે કહ્યું કે તું મારી દીકરી છે. તારું કન્યાદાન હું પોતે કરીશ. લગ્ન પહેલાં મને ઓફિસમાં બોલાવી અને રેપ કર્યો.’આ આપવીતી કેપ્ટન બાબા ઉર્ફે અશોક ખરાત વિરુદ્ધ પહેલી FIR કરાવનાર મહિલાની છે. વીડિયો વાયરલ થયા પછી પીડિતા અને તેમનો પરિવાર બદનામીના કારણે સામે આવવા માંગતો નથી. મોટાભાગની ઘર છોડીને જતી રહી છે.ખરાત વિરુદ્ધ અત્યાર સુધીમાં 12 FIR નોંધાઈ છે. જેમાંથી 8 જાતીય સતામણીની છે. પોલીસને 58 અશ્લીલ વીડિયો મળ્યા છે. તપાસમાં સામે આવ્યું છે કે 150થી વધુ મહિલાઓ બળાત્કાર અને જાતીય સતામણીનો ભોગ બની હોઈ શકે છે. ભાસ્કરે નાસિક SIT પાસેથી બાબા વિરુદ્ધ ફરિયાદ કરનાર પ્રથમ પીડિતાની આપવીતી જાણી અને વકીલો સાથે વાત કરી.

નાસિક પોલીસે અશોક ખરાતની 18 માર્ચે ધરપકડ કરી હતી. તેની વિરુદ્ધ પહેલી FIR પ્રાઇવેટ કંપનીમાં કામ કરતી 30 વર્ષની મહિલાએ કરાવી હતી. નાસિક SIT સાથે જોડાયેલા એક સ્ત્રોત દ્વારા અમને મહિલાનું લોકેશન અને ફોન નંબર મળ્યો. જ્યારે સંપર્ક કર્યો, તો ઘરના લોકોએ રોન્ગ નંબર કહીને ફોન કાપી નાખ્યો.ફોન કપાયાની થોડી વાર પછી SITમાં સામેલ ઇન્સ્પેક્ટર તૃપ્તિ સોનવણેનો ફોન આવ્યો. તેમણે અમારી ઓળખ પૂછી અને પીડિતાને ફોન કરવાનું કારણ જાણ્યું. તૃપ્તિ કહે છે, ‘નાસિક પોલીસ દરેક મહિલાની ગોપનીયતાનું ધ્યાન રાખી રહી છે. તેમનો સંપર્ક ન કરો. પીડિતો સાથે થયેલો ગુનો અત્યંત ગંભીર છે. તેથી પરિવારોનું સતત કાઉન્સેલિંગ થઈ રહ્યું છે.’

પહેલી FIR કરાવનારી મહિલા સુધી પહોંચવું મુશ્કેલ હતું, તેથી અમે તેમના વકીલ અને પોલીસને આપેલા નિવેદનો તપાસ્યા. આના દ્વારા કેપ્ટન બાબાની મહિલાઓને ફસાવવાની રીત સમજવાની કોશિશ કરી. અમને તેની 17 માર્ચની FIR મળી. પોલીસને આપેલા નિવેદનમાં મહિલાએ 4 મહત્વની વાતો કહી છે:પીડિતા 2019માં સંબંધી દ્વારા બાબાને મળી. તે લગ્નને લઈને પરેશાન હતી. ખરાતે દૈવી શક્તિ હોવાનો ખોટો દાવો કર્યો અને દીકરી કહીને ભરોસામાં લીધી. 50 હજાર અને 28 હજાર રૂપિયાના ખાસ પથ્થર આપ્યા. બંને તાવીજની જેમ પહેરવા માટે કહ્યું. નશીલો પદાર્થ પીવડાવીને નવેમ્બર 2022થી ડિસેમ્બર 2025 સુધી રેપ કર્યો.

પીડિતાએ આગળ જણાવ્યું, ‘હું 2019માં પહેલીવાર ખરાતને મળી. બાબાએ કહ્યું કે તું ચિંતા ન કર, તને પોખરાજ પથ્થર આપું છું. તેને ખંડોબા મંદિર લઈ જજે. ત્યાં ભગવાનને 11 નારિયેળ ચઢાવીને પથ્થર ગળામાં લોકેટ બનાવીને પહેરી લેજે. તારા લગ્ન સારી જગ્યાએ થઈ જશે.’’નવેમ્બર 2022માં મારી સગાઈ થઈ. મંગેતર સાથે બાબાના આશીર્વાદ લેવા ગઈ. બાબાએ કહ્યું કે લગ્ન પહેલા ઈશાન્યેશ્વર મહાદેવ મંદિરમાં સિદ્ધપૂજા કરવી પડશે. મંદિરમાં થનારા પૂજા વિધાન વિશે જણાવવા માટે ઓફિસ બોલાવી. અહીં જ પહેલીવાર રેપ કર્યો. આ પછી ત્રણ વર્ષ સુધી ઘણી વાર રેપ કર્યો.’

પીડિતાના જણાવ્યા મુજબ, લગ્ન પછી પણ પતિના મોત અને બદનામીનો ડર બતાવીને ખરાત ધાર્મિક પૂજા માટે ઓફિસ બોલાવતો હતો. કંટાળીને 17 માર્ચ 2026ના રોજ મેં સરકારવાડા પોલીસ સ્ટેશનમાં FIR નોંધાવી દીધી. નાસિક કોર્ટમાં વકીલો દ્વારા અમને પીડિત મહિલાના વકીલ એમ.વાય. કાલેનો નંબર મળ્યો. તેમનું કહેવું છે કે આ કેસે પીડિત મહિલાઓના જીવન પર ઊંડી અસર પાડી છે. બદનામીના ડરથી ઘણા સાક્ષીઓ અને પીડિતાઓ ચૂપ છે, તેથી તપાસમાં અવરોધ આવી રહ્યો છે.

કાલે દાવો કરે છે કે ખરાત વિરુદ્ધ જેટલા કેસ સામે આવ્યા છે, તે તેના ગુનાની તુલનામાં ખૂબ ઓછા છે. હજી તેના પર નોંધાયેલી પહેલી FIR પર જ તપાસ શરૂ થઈ છે. અમે ખરાત પર લાગેલા આરોપો પર તેના વકીલ સચિન ભાટે સાથે પણ વાત કરી. તેમણે મામલો કોર્ટમાં હોવાનું જણાવીને કંઈ પણ કહેવાનો ઇનકાર કરી દીધો. 10×12ની ઓફિસ, દીવાલ પર લખ્યું- ‘કોશિશ કરનારાઓની હાર નથી થતી’. અમે નાસિક ટાઉનમાં ખરાતની ઓફિસે પહોંચ્યા, જ્યાં તે મહિલાઓને બોલાવતો હતો. તેનાથી જોડાયેલા 58 અશ્લીલ વીડિયો આ જ ઓફિસના છે. આ ઓફિસ નાસિકના કેનેડા કોર્નર વિસ્તારમાં છે. અહીં મોટા અક્ષરોમાં લખ્યું છે- ‘ઓકસ પ્રોપર્ટી ડીલર્સ એન્ડ ડેવલપર્સ’.1998માં ખરાત રિયલ એસ્ટેટ એજન્ટનું કામ કરતો હતો. જમીનના સોદા દરમિયાન વગદાર લોકોના સંપર્કમાં આવ્યો. તેને અંકશાસ્ત્રમાં રસ હતો. ધીરે ધીરે તેણે ભવિષ્ય જણાવવાનું શરૂ કરી દીધું.

2014માં ખરાતે કેનેડા કોર્નર વિસ્તારમાં 10 બાય 12ની આ ઓફિસ ખોલી. 6 વર્ષમાં નાસિકનો જાણીતો ભવિષ્યવક્તા બની ગયો. કોરોના દરમિયાન 2021માં તેની પાસે આવનારા લોકોની સંખ્યા વધવા લાગી. 2024માં હાલત એવી થઈ ગઈ કે એપોઈન્ટમેન્ટ માટે 10થી 25 હજાર રૂપિયા લેવા લાગ્યો. ત્યારે પણ 3 મહિના પછી મળવાનો નંબર આવતો હતો.ખરાતની ઓફિસની સામે એસએસ કન્સ્ટ્રક્શન નામની રિયલ એસ્ટેટ ફર્મ છે. અહીં મળેલા સાગર ડાઉકર કહે છે, ‘ખરાતની ઓફિસમાં દર શનિવારે સવારે 8 વાગ્યાથી જ લોકોની લાઈન લાગવા માંડતી હતી. આખી ઓફિસ 2 ભાગમાં વહેંચાયેલી છે. પહેલા વેટિંગ એરિયા છે. ખરાતની કેબિન આની સાથે જોડાયેલી છે. કેબિનની ચારે બાજુ કાળા રંગના કાચની દીવાલો છે. આનાથી અંદર શું થઈ રહ્યું છે, તે બહાર બેઠેલા લોકોને દેખાતું નહોતું.’

આસપાસના લોકોએ જણાવ્યું કે ખરાતની ઓફિસમાં એન્ટ્રી પોઈન્ટ પર તિરંગો લાગ્યો હતો. દીવાલ પર ‘લહેરો સે ડરકર નૌકા પાર નહીં હોતી’ જેવી મોટિવેશનલ લાઇન લખેલી હતી. 28 માર્ચે SITએ ઓફિસ સીલ કરી દીધી. અમે અશોક ખરાતના જૂના ઓફિસ સ્ટાફનો સંપર્ક કરવાની કોશિશ કરી. તે ગયા વર્ષ સુધી અશોક ખરાતની ઓફિસમાં આસિસ્ટન્ટ હતો. ખરાત તેને 8 હજાર રૂપિયા સેલરી આપતો હતો.

SITને આપેલા નિવેદનમાં સ્ટાફે જણાવ્યું, ‘2023માં પ્રેગ્નન્ટ પત્નીને લઈને હું ખરાત પાસે ગયો હતો જેથી બાળક સ્વસ્થ જન્મે. તેણે ધાર્મિક પૂજાના બહાને પત્ની સાથે છેડછાડ કરી. આ ઘટના પછીથી જ મેં ખરાતની કરતૂતો પર નજર રાખવાનું શરૂ કરી દીધું. તેનો પર્દાફાશ કરવા માટે મિત્રની મદદથી ઓફિસમાં એક હિડન કેમેરો લગાવ્યો. પછી બાબાનું સત્ય સામે આવી ગયું.’મહારાષ્ટ્ર પોલીસ સાથે જોડાયેલા એક સ્ત્રોત મુજબ, 29 ડિસેમ્બર 2025ના રોજ ખરાતે 2 લોકો વિરુદ્ધ પાંચ કરોડની વસૂલાતનો કેસ નોંધાવ્યો હતો. ખરાતે આરોપ લગાવ્યો હતો કે કેટલાક લોકો તેનો અશ્લીલ AI મોર્ફ વીડિયો બનાવીને બ્લેકમેલ કરી રહ્યા છે. ત્યારે બાબાના આસિસ્ટન્ટ પર પણ શંકા વ્યક્ત કરવામાં આવી હતી. ખરાતની FIRના દોઢ મહિના પછી 18 ફેબ્રુઆરીએ 24 વર્ષની યુવતીએ એ જ આસિસ્ટન્ટ વિરુદ્ધ FIR નોંધાવી હતી. તેણે આસિસ્ટન્ટ પર તેની અશ્લીલ ફોટો શેર કરવાનો આરોપ લગાવ્યો હતો. ત્યારથી ખરાતનો આસિસ્ટન્ટ મહારાષ્ટ્ર પોલીસની દેખરેખમાં છે.

નાસિક SIT સાથે જોડાયેલા એક સીનિયર ઓફિસર કહે છે, ‘અશોક ખરાત વિરુદ્ધ નોંધાયેલી રેપની તમામ ફરિયાદોમાં એક કોમન પેટર્ન છે. કેસ નોંધાવનારી મોટાભાગની મહિલાઓનું કહેવું છે કે બાબા તંત્ર પૂજા કર્યા પછી તેમને ધમકાવતો હતો. તેમના મગજમાં એ વાત નાખવાની કોશિશ કરતો કે જો તેઓ આ વાત કોઈને કહેશે, તો તેમના બાળકો સાથે ખરાબ થશે અથવા પરિવારમાં કોઈ અઘટિત ઘટના બની શકે છે.’