Related Posts
Category : National
કેજરીવાલની અરજી પર દિલ્હી હાઈકોર્ટમાં સુનાવણી:
દિલ્હી હાઈકોર્ટમાં આજે મુખ્યમંત્રી અરવિંદ કેજરીવાલની અરજી પર સુનાવણી ચાલી રહી છે. કેજરીવાલ વતી વરિષ્ઠ એડવોકેટ અભિષેક મનુ સિંઘવી અને એડવોકેટ વિક્રમ ચૌધરી હાજર છે. ED વતી ASG એસવી રાજુ હાજર છે.
સિંઘવીએ કોર્ટમાં કહ્યું- લેવલ પ્લેઇંગને ધ્યાનમાં રાખીને આ ખૂબ જ મહત્વપૂર્ણ કેસ છે. તેમાં સ્વતંત્ર અને નિષ્પક્ષ લોકસભા ચૂંટણીનો સમાવેશ થાય છે, જે લોકશાહીનો એક ભાગ છે. તે આપણું મૂળભૂત માળખું બનાવે છે. કેજરીવાલની ધરપકડથી એ નિશ્ચિત થઈ ગયું છે કે તેઓ લોકતાંત્રિક પ્રવૃત્તિઓમાં ભાગ લઈ શકશે નહીં. પ્રથમ મતદાન થાય તે પહેલા જ કેજરીવાલ અને તેમની પાર્ટીને વેરવિખેર કરવાના પ્રયાસ થઈ રહ્યા છે.
સિંઘવીએ કહ્યું કે ધરપકડનો સમય દર્શાવે છે કે તે ગેરબંધારણીય છે. EDએ કોઈપણ તપાસ, જુબાની કે પુરાવા વગર ધરપકડ કરી હતી. કેજરીવાલે સમન્સનો દરેક વખતે લેખિતમાં જવાબ આપ્યો છે. ધરપકડનો આધાર શું છે, તેની શું જરૂર છે. આ સવાલ EDને વારંવાર પૂછવા જોઈએ.
કોર્ટે આ મામલે EDને નોટિસ પાઠવી હતી અને 2 એપ્રિલ સુધીમાં જવાબ માંગ્યો હતો. EDએ 2 એપ્રિલની સાંજે કોર્ટમાં પોતાનો જવાબ દાખલ કર્યો હતો. જેમાં એજન્સીએ કહ્યું કે આમ આદમી પાર્ટીએ કેજરીવાલ દ્વારા મની લોન્ડરિંગ કર્યું. ED અનુસાર, AAPને દિલ્હી લિકર પોલિસી કેસના પૈસાથી સૌથી વધુ ફાયદો થયો છે. ગોવા વિધાનસભા ચૂંટણી 2022માં પાર્ટીએ લિકર પોલિસી કેસમાં લગભગ 45 કરોડ રૂપિયા ખર્ચ્યા હતા.
આ તરફ, દિલ્હી સરકારના મંત્રી આતિશીએ X પર લખ્યું- અરવિંદ કેજરીવાલ ગંભીર ડાયાબિટીસના દર્દી છે. ધરપકડ બાદ કેજરીવાલના વજનમાં 4.5 કિલોનો ઘટાડો થયો છે. આ ખૂબ જ ચિંતાજનક છે. આજે ભાજપ તેમને જેલમાં નાખીને તેમનું સ્વાસ્થ્ય જોખમમાં મૂકી રહ્યું છે. જો તેમને કંઈ થાય તો આખો દેશતો શું, ભગવાન પણ તેમને માફ નહીં કરે.
જ્યારે ભાસ્કરે આ અંગે પ્રશ્ન કર્યો તો તિહાર જેલ પ્રશાસનના સૂત્રોએ જણાવ્યું કે કેજરીવાલની તબિયત બિલકુલ ઠીક છે. મેડિકલ ટીમ તેની સતત દેખરેખ રાખી રહી છે. ડોકટરો પણ કોઈ ચિંતા વ્યક્ત કરી નથી. કેજરીવાલ ઘરનું ભોજન જ લઈ રહ્યા છે.
Load more
