ભારત અને ઈંગ્લેન્ડ વચ્ચે 25 જાન્યુઆરીથી 5 મેચની ટેસ્ટ શ્રેણી શરૂ થશે

ભારત અને ઈંગ્લેન્ડ વચ્ચે 25 જાન્યુઆરીથી 5 મેચની ટેસ્ટ શ્રેણી શરૂ થશે

છેલ્લા કેટલાક દિવસોથી ભારતીય ક્રિકેટમાં સૌથી મોટી ચર્ચા અફઘાનિસ્તાન સામેની T20 શ્રેણીને લઈને થઈ રહી છે. તેનું કારણ છે આ વર્ષે યોજાનાર T20 વર્લ્ડ કપ અને તે પહેલા ભારતની T20 ફોર્મેટમાં છેલ્લી ઈવેન્ટ છે. પરંતુ ભારતીય ટીમ માટે ખરો પડકાર 25 જાન્યુઆરીથી હૈદરાબાદમાં શરૂ થવા જઈ રહ્યો છે, જ્યારે ઈંગ્લેન્ડ સામે મેચની ટેસ્ટ સિરીઝ શરૂ થશે. જેના માટે ઈંગ્લેન્ડ છેલ્લા કેટલાક દિવસોથી તૈયારી કરી રહ્યું છે પરંતુ ટીમ ઈન્ડિયાની તૈયારી 3 દિવસ પછી શરૂ થશે.

T20 બાદ ટેસ્ટ સિરીઝની તૈયારીઓ શરૂ થશે

ભારત અને અફઘાનિસ્તાન વચ્ચે બુધવારે 17 જાન્યુઆરીએ T20 શ્રેણીની ત્રીજી અને છેલ્લી મેચ રમાશે. આ મેચ બેંગલુરુના એમ ચિન્નાસ્વામી સ્ટેડિયમમાં રમાશે. ભારતીય ટીમ આ સિરીઝ પહેલા જ જીતી ચૂકી છે છતાં કેપ્ટન રોહિત શર્મા અને વિરાટ કોહલી જેવા સિનિયર બેટ્સમેન અંતિમ મેચમાં રમશે તે નિશ્ચિત છે. કારણ કે રોહિત છેલ્લી બે મેચમાં પોતાનું ખાતું ખોલાવી શક્યો ન હતો, જ્યારે વિરાટ માત્ર એક જ મેચ રમ્યો હતો. સિરીઝ પૂરી થયા બાદ ટેસ્ટ સિરીઝની તૈયારીઓ શરૂ થશે.

T20 બાદ બ્રેક મળશે

કોહલી અને રોહિત સિવાય આ T20 સિરીઝમાં કેટલાક એવા ખેલાડી છે જે ટેસ્ટ સિરીઝની ટીમનો ભાગ છે. આ ટીમમાંથી શુભમન ગિલ, યશસ્વી જયસ્વાલ, કુલદીપ યાદવ, અક્ષર પટેલ, મુકેશ કુમાર અને આવેશ ખાન પણ ટેસ્ટ શ્રેણીમાં રમવા જશે. આવી સ્થિતિમાં ટેસ્ટ સિરીઝ પહેલા ટીમ મેનેજમેન્ટે ખેલાડીઓને ટૂંકો બ્રેક આપવાનો નિર્ણય કર્યો છે. ક્રિકબઝના રિપોર્ટ અનુસાર, T20 સિરીઝ બાદ ટેસ્ટ ટીમના ખેલાડીઓ પોતપોતાના ઘરે જશે અને 2 દિવસ આરામ કરશે.

હૈદરાબાદમાં 4 દિવસીય કેમ્પ

T20 સિરીઝ બાદ ઈંગ્લેન્ડને હરાવવાની તૈયારીઓ શરૂ થઈ જશે. શ્રેણીની પ્રથમ મેચ 25 જાન્યુઆરીથી હૈદરાબાદના ઉપ્પલ સ્ટેડિયમમાં રમાશે. આથી ટીમ ઈન્ડિયા પણ હૈદરાબાદમાં કેમ્પ કરશે. રિપોર્ટ અનુસાર, ટીમ મેનેજમેન્ટે ટેસ્ટ ટીમના ખેલાડીઓને 20 જાન્યુઆરીએ હૈદરાબાદમાં એસેમ્બલ થવા માટે કહ્યું છે. આ પછી 21 જાન્યુઆરીથી 4 દિવસીય ટ્રેનિંગ કેમ્પ શરૂ થશે. જો કે હજુ એ સ્પષ્ટ નથી થયું કે ટીમ ઈન્ડિયા કોઈ ઈન્ટ્રા-સ્કવોડ પ્રેક્ટિસ મેચ રમશે કે નહીં. ટીમમાંથી માત્ર વિરાટ કોહલી 22 જાન્યુઆરીએ ઉપલબ્ધ રહેશે નહીં કારણ કે તે અયોધ્યામાં રામ લલ્લાના પ્રાણ પ્રતિષ્ઠા કાર્યક્રમમાં ભાગ લેશે.

ઈંગ્લેન્ડની તૈયારીઓ ચાલુ

ટીમ ઈન્ડિયાની પ્રેક્ટિસ હજુ શરૂ થઈ નથી, પરંતુ ઈંગ્લેન્ડની ટીમે તૈયારીઓ શરૂ કરી દીધી છે. બેન સ્ટોક્સની કપ્તાનીવાળી ટીમ અબુ ધાબીમાં 10 દિવસના ટ્રેનિંગ કેમ્પમાં વ્યસ્ત છે. 2022માં પાકિસ્તાનના પ્રવાસ પહેલા પણ ઈંગ્લેન્ડે અબુ ધાબીમાં પ્રેક્ટિસ કરી હતી. જેના કારણે તેમને શ્રેણીમાં ફાયદો થયો હતો. આ જ આશા સાથે ઈંગ્લિશ ટીમ પરસેવો પાડી રહી છે. ત્યારબાદ 21મી જાન્યુઆરીએ ઈંગ્લિશ ટીમ હૈદરાબાદ પહોંચશે.