Related Posts
Category : Gujarat
ગયા વર્ષે પણ ભાઈ જેલમાં હતા આજે પણ જેલમાં…” MLA Chaitar Vasava ને રાખડી બાંધતી વખતે રડી પડી બહેનો
MLA Chaitar Vasava Jail: આમ આદમી પાર્ટીના ડેડિયાપાડાના લોકપ્રિય ધારાસભ્ય ચૈતર વસાવા હાલ વડોદરા સેન્ટ્રલ જેલ ખાતે પોતાની કેદની સજા ભોગવી રહ્યા છે. રક્ષાબંધનના પવિત્ર તહેવાર નિમિત્તે જેલની ચાર દિવાલો વચ્ચે ભાઈ-બહેનના અતૂટ પ્રેમ અને લાગણીના અનોખા દ્રશ્યો જોવા મળ્યા હતા. ચૈતર વસાવાની સગાં-સંબંધી બહેનો તેમને રાખડી બાંધવા માટે ખાસ વડોદરા સેન્ટ્રલ જેલ ખાતે પહોંચી હતી. જેલ પ્રશાસનની વિધિવત મંજૂરી મેળવ્યા બાદ બહેનોએ જેલ પરિસરમાં જ પોતાના ભાઈના કાંડે રક્ષાસૂત્ર બાંધીને તેમના દીર્ઘાયુ અને જલ્દી મુક્તિ માટે ઈશ્વરને પ્રાર્થના કરી હતી.
વડોદરા સેન્ટ્રલ જેલમાં MLA Chaitar Vasava એ કરી રક્ષાબંધનની ઉજવણી
ઉલ્લેખનીય છે કે, ડેડિયાપાડાના ધારાસભ્ય ચૈતર વસાવા સામે અગાઉ વન વિભાગના કર્મચારીઓ પર હુમલો કરવા, મારઝૂડ કરવા તેમજ હવામાં ફાયરિંગ કરીને ભયનો માહોલ ઊભો કરવાના ગંભીર આક્ષેપો સાથેનો કેસ નોંધાયો હતો. આ ચકચારી કેસની સુનાવણી બાદ નર્મદા જિલ્લાના રાજપીપળા સ્થિત સત્ર કોર્ટે તેમને કાયદો તોડવાના ગુનામાં દોષિત ઠેરવ્યા હતા. અદાલતે તેમને 7 વર્ષની સખત કેદની સજા ફટકારવાની સાથે અંદાજે 96,000 રૂપિયાનો દંડ પણ કર્યો હતો. કોર્ટના આ ચૂકાદા પછી તેમને તાત્કાલિક અસરથી વડોદરા સેન્ટ્રલ જેલ હવાલે કરવામાં આવ્યા હતા. સજા સામે રાહત મેળવવા માટે તેમના વકીલો દ્વારા ગુજરાત હાઈકોર્ટમાં જામીન મેળવવા અરજીઓ દાખલ કરવામાં આવી હતી, પરંતુ હાઈકોર્ટે હાલ તે અરજીઓને નામંજૂર કરી દીધી છે.
બહેનોની આંખોમાં આંસુ
જેલની મુલાકાત લીધા બાદ મીડિયા સમક્ષ વાતચીત કરતી વખતે ચૈતર વસાવાના બહેન સુક્ષમબેન વસાવા ભાવુક થઈ ગયા હતા અને તેમની આંખોમાં આંસુ આવી ગયા હતા. તેમણે દુઃખ વ્યક્ત કરતા જણાવ્યું હતું કે, ગત વર્ષે પણ તેમનો ભાઈ જેલની સજા કાપી રહ્યો હતો અને આ વર્ષે પણ રક્ષાબંધન જેવા પવિત્ર તહેવાર પર તેમને જેલમાં જઈને રાખડી બાંધવી પડી છે.
Load more
