ઈન્ફ્લુએન્સરને 'રીલ'નું વળગણ 'રીયલ'માં નડ્યું:સોશિયલ મીડિયા સ્ટાર્સ માટે લાલબત્તી સમાન કિસ્સો

ઈન્ફ્લુએન્સરને ‘રીલ’નું વળગણ ‘રીયલ’માં નડ્યું:સોશિયલ મીડિયા સ્ટાર્સ માટે લાલબત્તી સમાન કિસ્સો

સોશિયલ મીડિયા પર ફેમસ થવાની લ્હાય અને કાયદાનો ડર ન હોવાના પરિણામે સુરતના રસ્તા પર વધુ એક નશાખોરનો આતંક જોવા મળ્યો હતો. જૂનાગઢના જાણીતા સોશિયલ મીડિયા ઈન્ફ્લુએન્સર હિરેન પટેલે સુરતમાં નશાની હાલતમાં લકઝરી કાર હંકારી અકસ્માત સર્જતા ચકચાર મચી ગઈ છે. હજારો ફોલોવર્સ ધરાવતા આ યુવકની ‘રીલ લાઈફ’ હવે તેની ‘રીયલ લાઈફ’ માટે મુસીબત બની ગઈ છે.

જુનાગઢનો ઈન્ફ્લુએન્સર હિરેન બુહા દર મહિને બે વખત રીલ બનાવવા માટે સુરત આવતો હતો. 22મી તારીખે તે મોટા વરાછામાં એક જાહેરાતનો વીડિયો બનાવવા આવ્યો હતો. આ પહેલાં તે સવારે મિત્ર સાથે કારમાં દમણ ગયો હતો, જ્યાં તેણે રીલ બનાવી હતી. દમણથી સાંજે સુરત પરત ફર્યા બાદ હિરેન બુહાએ મોટા વરાછામાં રીલ બનાવી હતી. જે બાદ નશાની હાલતમાં અકસ્માત સર્જ્યો હતો.

શું હતી સમગ્ર ઘટના? મળતી માહિતી મુજબ, જૂનાગઢનો રહેવાસી અને સોશિયલ મીડિયા પર લાખો ફોલોવર્સ ધરાવતો 28 વર્ષીય હિરેન પટેલ (બુહા) સુરતની મુલાકાતે હતો. રાત્રિના સમયે તે ઉમરા વિસ્તાર તરફથી પોતાની કાર લઈને આવી રહ્યો હતો. જ્યાં મોટા વરાછા દુખિયારા દરબાર રોડ પરથી પસાર થતી વખતે તેણે કાર પરનો કાબૂ ગુમાવ્યો હતો અને અકસ્માત સર્જ્યો હતો. અકસ્માત એટલો જોરદાર હતો કે આસપાસના લોકો તરત જ એકઠા થઈ ગયા હતા.

નશામાં ધૂત ઈન્ફ્લુએન્સરને જોઈને લોકોનો ગુસ્સો સાતમા આસમાને પહોંચ્યો અકસ્માત બાદ જ્યારે સ્થાનિક લોકોએ ડ્રાઈવરની સીટ પર બેઠેલા હિરેન પટેલને બહાર કાઢ્યો, ત્યારે તે નશામાં ચકચૂર જોવા મળ્યો હતો. તે સરખી રીતે ઊભો પણ રહી શકતો નહોતો. નશામાં ધૂત ઈન્ફ્લુએન્સરને જોઈને લોકોનો ગુસ્સો સાતમા આસમાને પહોંચ્યો હતો. ઘટનાસ્થળે જ લોકોએ તેને પકડીને મેથીપાક ચખાડ્યો હતો અને ત્યારબાદ પોલીસને હવાલે કર્યો હતો.

મોટાભાગના વીડિયો દારૂ પીવાને લગતા અથવા દારૂ સાથેની કોમેડીના હિરેન પટેલના સોશિયલ મીડિયા એકાઉન્ટ તપાસતા ચોંકાવનારી વિગતો સામે આવી છે. 7 લાખથી વધુ ફોલોવર્સ ધરાવતા આ ઈન્ફ્લુએન્સરના મોટાભાગના વીડિયો દારૂ પીવાને લગતા અથવા દારૂ સાથેની કોમેડીના છે. તે સતત દારૂને ગ્લોરીફાય કરતી રીલ્સ બનાવીને કમાણી કરતો હતો. જે વીડિયો તે મનોરંજન માટે બનાવતો હતો, તે જ વ્યસને તેને જેલના સળિયા પાછળ ધકેલી દીધો છે.

ડ્રિંક એન્ડ ડ્રાઈવ હેઠળ ગુનો નોંધી હિરેનની ધરપકડ આ બાબતે ઉમરા પોલીસ સ્ટેશનના પીઆઇ દિગ્વિજય બારડે જણાવ્યું હતું કે, આરોપી હિરેન પટેલ મૂળ જૂનાગઢનો વતની છે અને સુરતમાં અવરજવર કરતો રહે છે. અકસ્માત સમયે તે દારૂના નશામાં હોવાનું પ્રાથમિક દ્રષ્ટિએ જણાયું છે. તેની ધરપકડ કરવામાં આવી છે અને ડ્રિંક એન્ડ ડ્રાઈવ હેઠળ ગુનો નોંધી આગળની કાયદેસરની કાર્યવાહી હાથ ધરવામાં આવી છે.

સોશિયલ મીડિયા સ્ટાર્સ માટે લાલબત્તી સમાન કિસ્સો આ કિસ્સો સોશિયલ મીડિયા પર જાણીતા બનતા યુવાનો માટે એક મોટો બોધપાઠ છે. ડિજિટલ પ્લેટફોર્મ પર લોકપ્રિયતા મેળવવા માટે ઘણીવાર યુવાનો ખોટા રસ્તે વળે છે અથવા વ્યસનોને પ્રોત્સાહન આપે છે. હિરેન પટેલની ‘રીલ’ લાઈફમાં દારૂ પીને કોમેડી કરવી આજે તેની વાસ્તવિક જિંદગીમાં અંધકાર લઈ આવી છે. સુરત પોલીસે કડક કાર્યવાહીના સંકેત આપ્યા છે જેથી અન્ય કોઈ આવી બેદરકારી દાખવતા પહેલા સો વાર વિચારે.