Related Posts
Category : Sports
World Cup 2023: IND Vs AUS, – 36 વર્ષ પછી બની રહ્યો છે અનોખો સંયોગ, ટીમ ઇન્ડિયા લેશે બદલો ?
ICC ક્રિકેટ વર્લ્ડ કપ 2023 5 ઓક્ટોબર (ગુરુવાર) થી શરૂ થયો છે. વર્લ્ડ કપની શરૂઆતની મેચમાં ઈંગ્લેન્ડનો સામનો ન્યુઝીલેન્ડ સામે થયો હતો. બીજી મેચમાં પાકિસ્તાનની ટીમ નેધરલેન્ડ સામે ટકરાશે. હવે બધાની નજર વર્લ્ડ કપમાં ભારતીય ટીમની મેચ પર છે. ટીમ ઈન્ડિયા પોતાના અભિયાનની શરૂઆત ઓસ્ટ્રેલિયા સામેની મેચથી કરવા જઈ રહી છે.
ભારત અને ઓસ્ટ્રેલિયા વચ્ચે 8 ઓક્ટોબરે ચેન્નાઈના એમએ ચિદમ્બરમ ખાતે મેચ રમાવાની છે. 36 વર્ષ બાદ એવો સંયોગ બની રહ્યો છે કે ભારત અને ઓસ્ટ્રેલિયા વર્લ્ડ કપની પોતાની પ્રથમ મેચમાં આમને-સામને છે. આ પહેલા છેલ્લી વખત આવો સંયોગ વર્ષ 1987માં યોજાયેલા વર્લ્ડ કપમાં બન્યો હતો. ખાસ વાત એ છે કે તે સમયે પણ ચેન્નાઈના મેદાન પર જ મેચ યોજાઈ હતી.
જો કે, તે મેચ ભારત માટે યાદગાર રહી ન હતી અને તેને 1 રનથી હારનો સામનો કરવો પડ્યો હતો. તે મેચમાં ઓસ્ટ્રેલિયન ટીમે ટોસ હારીને પ્રથમ બેટિંગ કરતા છ વિકેટે 270 રન બનાવ્યા હતા. જ્યોફ માર્શે 141 બોલમાં 110 રન બનાવ્યા હતા જેમાં સાત ચોગ્ગા અને એક છગ્ગાનો સમાવેશ થાય છે. જ્યારે ડેવિડ બૂને 49 રનની અને ડીન જોન્સે 39 રનની ઇનિંગ રમી હતી.
ટાર્ગેટનો પીછો કરવા ઉતરેલી ભારતીય ટીમ 49.5 ઓવરમાં 269 રનમાં ઓલઆઉટ થઈ ગઈ હતી. નવજોત સિદ્ધુએ સૌથી વધુ 73 રન અને કૃષ્ણમાચારી શ્રીકાંતે 70 રનની ઇનિંગ રમી હતી. ક્રેગ મેકડર્મોટે સૌથી વધુ ચાર વિકેટ લીધી હતી. મેચની છેલ્લી ઓવર સ્ટીવ વોએ ફેંકી હતી, જેમાં તેણે મનિન્દર સિંહને બોલ્ડ કરીને કાંગારૂ ટીમને જીત અપાવી હતી.
ચેન્નાઈમાં ભારત અને ઓસ્ટ્રેલિયા વચ્ચે અત્યાર સુધીમાં ત્રણ વનડે મેચ રમાઈ છે, જેમાં કાંગારુ ટીમે બે અને ભારતે એક મેચ જીતી છે. આ મેદાન પર છેલ્લી વખત બંનેની મુલાકાત ઓસ્ટ્રેલિયાએ જીતી હતી. વર્લ્ડ કપમાં ભારત અને ઓસ્ટ્રેલિયા વચ્ચે કુલ 12 મેચ રમાઈ છે, જેમાં ભારત માત્ર ચાર મેચ જીતી શક્યું છે. ભારતીય ટીમે ચેન્નાઈના મેદાન પર કુલ 14 વન-ડે ઈન્ટરનેશનલ મેચ રમી છે. આ સમયગાળા દરમિયાન તેણે સાત મેચ જીતી અને છમાં હારનો સામનો કરવો પડ્યો. જ્યારે એક મેચ અનિર્ણિત રહી હતી.
Load more
