જાણો બોલીવુડના બચ્ચન પરિવાર પાસે કેટલી છે સંપતિ

જાણો બોલીવુડના બચ્ચન પરિવાર પાસે કેટલી છે સંપતિ

અમિતાભ બચ્ચને મુંબઈના જુહુ સ્થિત પોતાનો બંગલો તેમની દીકરી શ્વેતા નંદાના નામે કરી દીધો છે. રિપોર્ટ્સ અનુસાર, 16,840 સ્ક્વેર ફૂટમાં બનેલા આ બંગલાની કિંમત 50.63 કરોડ રૂપિયા છે.

81 વર્ષના બિગ બી પાસે પ્રતીક્ષા સિવાય મુંબઈમાં વધુ ચાર બંગલા છે. જેની કિંમત 3390 કરોડ રૂપિયા છે. ફિલ્મ ઈન્ડસ્ટ્રીમાં 54 વર્ષ વિતાવી ચૂકેલા બિગ બી હજુ પણ સૌથી વધુ કમાણી કરનારા કલાકારોની યાદીમાં સામેલ છે. એક ફિલ્મ માટે તેની ફી 15-20 કરોડની વચ્ચે છે.

બચ્ચન પરિવારના અન્ય સભ્યો પણ કરોડોના માલિક છે. જયાની પાસે 62 કરોડ રૂપિયાની જ્વેલરી છે જ્યારે ઐશ્વર્યા અભિષેક કરતાં પણ વધુ અમીર છે.

ચાલો જાણીએ બચ્ચન પરિવારના કયા સભ્ય પાસે કેટલી સંપત્તિ છે?

બિગ બી મુંબઈ આવતા પહેલાં ‘સોપાન’માં રહેતા હતા
મુંબઈ શિફ્ટ થતા પહેલાં અમિતાભ તેમનાં માતા-પિતા હરિવંશ રાય બચ્ચન અને તેજી બચ્ચન સાથે દિલ્હીના ઘર ‘સોપાન’માં રહેતા હતા. એવું કહેવાય છે કે બચ્ચન પરિવારનું આ પહેલું ઘર હતું. હરિવંશ રાય બચ્ચન 1980 સુધી ‘સોપાન’માં તેમના કવિતા સત્રનું આયોજન કરતા હતા. આ બંગલો અમિતાભની માતા તેજી બચ્ચનના નામે નોંધાયેલો હતો.

તેમના મૃત્યુ પછી, અમિતાભ બચ્ચને 2021માં ‘સોપાન’ વેચી દીધું હતું. તેમનું આ ઘર સાઉથ દિલ્હીના ગુલમોહર પાર્કમાં આવેલું હતું. રિપોર્ટ્સ અનુસાર, અમિતાભે આ ઘર 23 કરોડ રૂપિયામાં વેચ્યું હતું.

અમિતાભ બચ્ચનનું આ ઘર નિઝોન ગ્રૂપ ઓફ કંપનીઝના સીઈઓ અવની બદરે ખરીદ્યું હતું. અવની બચ્ચન પરિવારને 35 વર્ષથી વધુ સમયથી ઓળખે છે. અમિતાભનું આ 418.05 ચોરસ મીટરનું ઘર 7 ડિસેમ્બર 2021ના રોજ અવની બદરના નામે નોંધાયેલું હતું.

બિગ બીએ ‘પ્રતીક્ષા’ને 8 લાખ રૂપિયામાં ખરીદ્યું હતું
અમિતાભ બચ્ચન મુંબઈમાં સંઘર્ષના દિવસો દરમિયાન કોમેડિયન મહેમૂદના ઘરે રહેતા હતા, તે સમયે તેમની પાસે રહેવા માટે પોતાનું કોઈ સ્થાન ન હતું, પરંતુ આજે તેઓ પ્રતીક્ષા, જલસા, જનક, વત્સ અને આશિયાના નામના પાંચ બંગલાના માલિક છે.

તેમણે પોતાનો પહેલો બંગલો ‘પ્રતીક્ષા’ 1975માં 8 લાખ રૂપિયામાં ખરીદ્યો હતો. તેઓ વર્ષોથી આ બંગલામાં રહેતા હતા. આ બંગલામાં તમામ સામાજિક કાર્યો થાય છે. અભિષેક અને ઐશ્વર્યાનાં લગ્ન આ બંગલામાં થયાં હતાં.

પ્રતીક્ષાની બાજુમાં ‘જલસા’ બંગલો છે જ્યાં હવે આખો બચ્ચન પરિવાર રહે છે. તેની કિંમત 112 કરોડ રૂપિયા છે. ‘જલસા’ જુહુમાં સ્થિત છે જે લગભગ 10,125 ચોરસ ફૂટમાં બનેલ છે. અમિતાભને આ આલીશાન બંગલો 1982માં ભેટમાં મળ્યો હતો.

અમિતાભની ફિલ્મ સત્તે પે સત્તા 1982માં રિલીઝ થઈ હતી. આ ફિલ્મની સફળતા બાદ ફિલ્મ નિર્દેશક રમેશ સિપ્પીએ તેમને આ બંગલો ગિફ્ટ કર્યો હતો. થોડાં વર્ષો પછી બિગ બીએ અહીં પોતાના પરિવાર સાથે રહેવાનું શરૂ કર્યું.

સોશિયલ મીડિયા પર એક્ટિવ રહેતા બિગ બી અવારનવાર જલસાની કેટલીક તસવીરો શેર કરે છે જે તેમની શાનદાર જીવનશૈલીની ઝલક આપે છે.

જલસાના લિવિંગ રૂમની એક દીવાલ હરિવંશરાય બચ્ચન અને પરિવારના અન્ય સભ્યોના ફોટોગ્રાફ્સથી શણગારેલી છે. બીજી બાજુની દીવાલમાં એક શેલ્ફ પર પુસ્તકો રાખવામાં આવે છે.

ઘરના ઈન્ટિરિયરને કેટલીક એન્ટિક, કીમતી અને લક્ઝરી વસ્તુઓથી સજાવવામાં આવ્યું છે. ઘરના કેટલાક ભાગોમાં વુડન ફ્લોરિંગ પણ જોવા મળે છે.

જલસા પાસે ‘જનક’ બંગલો છે જ્યાં બિગ બીની ઓફિસ છે. બીજો બંગલો ‘વત્સ’ છે જે બેંકને લીઝ પર આપવામાં આવ્યો છે.

અમિતાભે ‘જનક’ને 8 કરોડ રૂપિયામાં અને ‘વત્સ’ને 5 કરોડ રૂપિયામાં ખરીદ્યું હતું. થોડાં વર્ષો પહેલાં તેમણે અંધેરીમાં એટલાન્ટિસ બિલ્ડિંગના 27મા અને 28મા માળે ડુપ્લેક્સ ‘આશિયાના’ ખરીદ્યું હતું.

5184 ચોરસ ફૂટ વિસ્તારના ડુપ્લેક્સની કિંમત 31 કરોડ રૂપિયા હોવાનું કહેવાય છે. આ ડુપ્લેક્સ એપાર્ટમેન્ટ સાથે 6 કાર માટે પાર્કિંગ પણ ઉપલબ્ધ છે. આ સિવાય અમિતાભ અલ્હાબાદમાં ફેમિલી પ્રોપર્ટીના માલિક છે. તેમની પાસે ફ્રાન્સમાં પણ પ્રોપર્ટી છે.

બિગ બી 3390 કરોડ રૂપિયાના માલિક
CA નોલેજ વેબસાઈટ અનુસાર, અમિતાભની કુલ સંપત્તિ 3390 કરોડ રૂપિયા છે. 1969માં રિલીઝ થયેલી તેની પહેલી ફિલ્મ ‘સાત હિન્દુસ્તાની’ માટે તેમને 5000 રૂપિયા મળ્યા હતા. આ પછી સતત આઠ ફિલ્મો ફ્લોપ ગઈ.

ચાર વર્ષ પછી 1973માં ‘જંજીર’થી તેમનું નસીબ ચમકવા લાગ્યું. આ પછી એક પછી એક સુપરહિટ ફિલ્મો આવી અને તેઓ તે સમયના સૌથી વધુ કમાણી કરનાર અભિનેતા બની ગયા. ક્લાસિક ફિલ્મ ‘શોલે’માં જયના રોલ માટે અમિતાભને એક લાખ રૂપિયા મળ્યા હતા. પાંચ વર્ષ પછી ફિલ્મ ‘શાન’ આવી ત્યાં સુધીમાં તેની ફી વધીને 9 લાખ રૂપિયા થઈ ગઈ હતી.

ફિલ્મ ‘ખુદા ગવાહ’ 1996માં આવી હતી. આ પછી તેમની ફી વધીને 3 કરોડ રૂપિયા થઈ ગઈ હતી. આજે, અમિતાભ બચ્ચન રોલ કેટલો લાંબો છે અને શિડ્યૂલ કેટલા દિવસનું છે તેના આધારે 15થી 20 કરોડ રૂપિયા ચાર્જ કરે છે.

મિસ વર્લ્ડ ઈવેન્ટ ડૂબી ગઈ હતી
બિગ બી 1999માં નાદારીની આરે હતા. તેમની ABCL કંપનીએ 1996માં બેંગલુરુમાં ‘મિસ વર્લ્ડ’ ઈવેન્ટનું સંચાલન સંભાળ્યું હતું. આ ઘટનામાં તેમને 7 કરોડ રૂપિયાનું નુકસાન થયું હતું. આ કંપનીએ ફિલ્મ ‘મૃત્યુદાતા’ બનાવી, તે પણ ખરાબ રીતે ફ્લોપ થઈ.

દેવું છુપાવવા જલસાનું સમારકામ કરાવડાવ્યું
અમિતાભ બચ્ચનનો ખરાબ સમય કોઈનાથી છુપાઈ શક્યો નથી. અમિતાભના પૈસા વગરના હોવાના સમાચાર આવતા જ તેમના ઘરે મીડિયાના લોકોની ભીડ એકઠી થવા લાગી હતી. પોતે ગરીબ હોવાની હકીકત છુપાવવા માટે અમિતાભે પોતાના ઘર જલસાનો બહારનો ભાગ રિપેર કરાવ્યો અને નવો દરવાજો પણ લગાવ્યો, જેથી લોકોને એમ લાગે કે તેમની આર્થિક સ્થિતિ સારી છે.

અમિતાભે તેમના મિત્રોને બોલાવ્યા અને તેમની લક્ઝુરિયસ કાર તેમના ઘરના પાર્કિંગમાં પાર્ક કરવા કહ્યું, જેથી જોનારાઓને લાગે કે અમિતાભ લક્ઝરી લાઈફ જીવી રહ્યા છે.

યશ ચોપરાની ‘મોહબ્બતેં’થી પુનરાગમન કર્યું
ABCLની નિષ્ફળતાને કારણે અમિતાભની સંપત્તિ પણ જપ્ત થવાનું જોખમ હતુ. આવી સ્થિતિમાં, એક સવારે તેમણે ફિલ્મ નિર્માતા યશ ચોપરા સાથે વાત કરી અને કામ માંગ્યું. યશ ચોપરાએ તેમને ફિલ્મ ‘મોહબ્બતેં’માં પ્રિન્સિપાલની ભૂમિકા આપી અને અહીંથી અમિતાભની આર્થિક સ્થિતિમાં સુધારાની નવી ઈનિંગ શરૂ થઈ.

KBCથી એક સિઝનમાં 70 કરોડ રૂપિયાની કમાણી

વર્ષ 2000માં જ, રિયાલિટી ગેમ શો કૌન બનેગા કરોડપતિએ બિગ બીને તેમના ખરાબ સમયમાંથી બહાર આવવામાં ઘણી મદદ કરી. ત્યારથી અમિતાભ આ શો સાથે જોડાયેલા છે. અહેવાલો અનુસાર, અમિતાભને હવે શો ‘કૌન બનેગા કરોડપતિ’ હોસ્ટ કરવા માટે પ્રતિ એપિસોડ 3.5 કરોડ રૂપિયા મળે છે. જો એક સિઝનમાં 20 એપિસોડ હોય તો તેમને 70 કરોડ રૂપિયા મળે છે.

બિગ બી પાસે 12 કરોડ રૂપિયાની કાર અને 3.4 કરોડ રૂપિયાની ઘડિયાળ
બિગ બી લક્ઝરી કારના શોખીન છે અને તેમની પાસે કુલ 11 કાર છે જેમાં લેક્સસ, રેન્જ રોવર ઓટોબાયોગ્રાફી, બેન્ટલી કોન્ટિનેંટલ જીટી, 2 BMW, 3 મર્સિડીઝનો સમાવેશ થાય છે. તેમનું કાર કલેક્શન લગભગ 12થી 15 કરોડ રૂપિયાનું છે.

ફિલ્મ ‘એકલવ્ય’માં તેમના શાનદાર અભિનય માટે નિર્માતા વિધુ વિનોદ ચોપરા દ્વારા તેમને સફેદ રોલ્સ રોયસ ફેન્ટમ કાર ભેટમાં આપવામાં આવી હતી. તેમના કાર કલેક્શનમાં આ સૌથી મોંઘી કાર હતી, જેની કિંમત લગભગ 4.5 કરોડ રૂપિયા છે. બિગ બીએ થોડા વર્ષો પહેલાં તેને વેચી દીધી હતી.

બિગ બી નંબર 2 ને લકી માને છે. તેમની જન્મ તારીખોનો સરવાળો પણ સમાન છે. તેમના તમામ કાર નંબરોમાં પણ 2 અંક છે. અમિતાભ અને જયા પાસે ઉત્તમ અને મોંઘી ઘડિયાળોનું કલેક્શન પણ છે. અમિતાભ પાસે 3.4 કરોડ રૂપિયાની ઘડિયાળો છે જ્યારે જયાની પાસે 51 લાખ રૂપિયાની ઘડિયાળ છે.

જયાની પાસે 62 કરોડ રૂપિયાની જ્વેલરી
મીડિયા રિપોર્ટ્સ અનુસાર, જ્યારે જયાએ 2017માં રાજ્યસભા માટે પોતાનું નોમિનેશન ફાઈલ કર્યું ત્યારે તેણે પોતાની સંપત્તિ 1001 કરોડ રૂપિયા હોવાનું જાહેર કર્યું હતું. એફિડેવિટ મુજબ જયાની પાસે 62 કરોડ રૂપિયાની જ્વેલરી છે.

અભિષેક બચ્ચનની કુલ સંપત્તિ 206 કરોડ
અમિતાભ બચ્ચનના પુત્ર અભિષેકની કુલ સંપત્તિ 206 કરોડ રૂપિયા છે. ફિલ્મો ઉપરાંત અભિષેક બ્રાન્ડ એન્ડોર્સમેન્ટથી પણ કમાણી કરે છે. આ ઉપરાંત, અભિનેતા પ્રો કબડ્ડી લીગ ટીમ જયપુર પિંક પેન્થર અને ઈન્ડિયન સુપર લીગ ફૂટબોલ ટીમ ચેન્નઈ એફસીનો માલિક પણ છે.

ઝી બિઝનેસના રિપોર્ટ અનુસાર તેમની પત્ની ઐશ્વર્યા રાય પાસે અભિષેક કરતાં વધુ સંપત્તિ છે. તે તેમના કરતાં ત્રણ ગણી અમીર છે. તેમની પાસે 828 કરોડ રૂપિયાની સંપત્તિ છે.

ઐશ્વર્યાએ પોતે રિયલ એસ્ટેટમાં કરોડોનું રોકાણ કર્યું છે. 2015માં તેણે મુંબઈના BKC (બાંદ્રા કુર્લા કોમ્પ્લેક્સ)માં 5-BHK એપાર્ટમેન્ટ ખરીદ્યું હતું જેની કિંમત 21 કરોડ રૂપિયા હતી.

આ સિવાય ઐશ્વર્યા પાસે મુંબઈના વર્લી સ્થિત સ્કાયલાર્ક ટાવર્સના 37મા માળે એક એપાર્ટમેન્ટ છે જેની કિંમત 41 કરોડ રૂપિયા છે.

વેબસાઈટ CA નોલેજના રિપોર્ટ અનુસાર, ઐશ્વર્યાએ અંદાજે 182 કરોડ રૂપિયાનું વ્યક્તિગત રોકાણ પણ કર્યું છે. માત્ર મુંબઈ જ નહીં, દુબઈના પોશ વિસ્તાર જુમેરાહ ગોલ્ફ એસ્ટેટમાં સેન્ચ્યુરી ફોલ્સમાં ઐશ્વર્યા પાસે લક્ઝરી હોલિડે વિલા પણ છે.

શ્વેતાના પતિ 456 કરોડ રૂપિયાના માલિક
અમિતાભ બચ્ચનની પુત્રી શ્વેતા બચ્ચન નંદા 49 વર્ષની છે. શ્વેતાએ 1997માં રણબીર કપૂરના પિતરાઈ ભાઈ (માસીનો પુત્ર) નિખિલ નંદા સાથે લગ્ન કર્યાં હતાં. શ્વેતા અને નિખિલને બે બાળકો છે – પુત્રી નવ્યા અને પુત્ર અગસ્ત્ય.

નિખિલ નંદા દિલ્હીના છે. નિખિલ એન્જિનિયરિંગ કંપની એસ્કોર્ટ્સ લિમિટેડના ચેરમેન અને મેનેજિંગ ડિરેક્ટર છે. આ કંપની તેમના દાદા હરપ્રસાદ નંદા દ્વારા 1944માં શરૂ કરવામાં આવી હતી, જે હવે નિખિલ દ્વારા સંચાલિત છે. મીડિયા રિપોર્ટ્સ અનુસાર, નિખિલની સંપત્તિ લગભગ 456 કરોડ રૂપિયા છે જ્યારે તેની કંપનીનું ટર્નઓવર લગભગ 7014 કરોડ રૂપિયા છે.