રાજસ્થાનમાં બે ભયાનક અકસ્માતથી હાહાકાર! : ખાટુશ્યામજીથી પરત ફરતા 9 અને ગુજરાતના 3 શ્રદ્ધાળુઓનાં મોત

By: Nation Gujarat Team
22 Nov, 2026

Rajasthan Road Accident: રાજસ્થાનમાં રવિવાર, 22 નવેમ્બર 2026ના રોજ બે અલગ-અલગ માર્ગ અકસ્માતોએ શ્રદ્ધાળુ પરિવારોની ખુશીઓને માતમમાં ફેરવી દીધી છે. કોટા જિલ્લામાં ખાટુશ્યામજીનાં દર્શન કરીને મહારાષ્ટ્ર પરત ફરી રહેલા એક જ પરિવારના નવ સભ્યોનાં માર્ગ અકસ્માતમાં મોત થયાં છે. આ દુર્ઘટનામાં છ લોકો ઘાયલ થયા હોવાનું પ્રાથમિક અહેવાલોમાં જણાવાયું છે. બીજી તરફ, જોધપુરમાં રામદેવરા મંદિરનાં દર્શન કરીને ગુજરાત પરત ફરી રહેલા બનાસકાંઠાના એક પરિવારનું વાહન અકસ્માતનો ભોગ બન્યું હતું. આ ઘટનામાં ત્રણ લોકોનાં મોત થયાં છે, જ્યારે આશરે 15 લોકો ઘાયલ થયા છે. બંને અકસ્માતોમાં કુલ 12 લોકોનાં મોત થયાં હોવાની માહિતી સામે આવી છે. ઘાયલોને નજીકની હોસ્પિટલોમાં ખસેડીને સારવાર આપવામાં આવી રહી છે. બંને ઘટનાઓમાં એક જ પરિવારના સભ્યો તીર્થયાત્રા પરથી પરત ફરી રહ્યા હતા ત્યારે અકસ્માત સર્જાયો હતો.

 

કોટા-ઉદયપુર હાઇવે પર ઊભેલા ટ્રક સાથે વાહનની ટક્કર, નવનાં મોત

કોટા જિલ્લાના નાતા પોલીસ સ્ટેશન વિસ્તારમાં આવેલા શંભુપુરા ગામ નજીક મધરાતના સમયે ગંભીર અકસ્માત સર્જાયો હતો. ખાટુશ્યામજીનાં દર્શન કરીને મહારાષ્ટ્ર પરત ફરી રહેલા શ્રદ્ધાળુઓનું વાહન રસ્તાની બાજુમાં ઊભેલા ટ્રક સાથે અથડાયું હતું. ટક્કર એટલી જોરદાર હતી કે વાહનમાં સવાર નવ લોકોનાં ઘટનાસ્થળે અથવા અકસ્માત બાદ મોત થયાં હતાં. પ્રાથમિક માહિતી પ્રમાણે વાહનમાં કુલ 16 લોકો મુસાફરી કરી રહ્યા હતા. તમામ લોકો એક જ પરિવારના સભ્યો હતા અને મહારાષ્ટ્રના રહેવાસી હોવાનું અધિકારીઓએ જણાવ્યું હતું. મૃતકોમાં બાળકોનો પણ સમાવેશ થાય છે. અકસ્માતમાં ઘાયલ થયેલા છ લોકોને તાત્કાલિક સારવાર માટે કોટાની ન્યૂ મેડિકલ કોલેજ હોસ્પિટલમાં ખસેડવામાં આવ્યા હતા.

મળતી માહિતી મુજબ, અકસ્માત કોટા-ઉદયપુર નેશનલ હાઇવે પર થયો હતો. સ્થાનિક પોલીસ અને વહીવટી તંત્રે ઘટનાસ્થળે પહોંચીને બચાવ કામગીરી હાથ ધરી હતી.

વાહનચાલકને ઊંઘની ઝોકું આવવાથી અકસ્માત થયાની આશંકા

પ્રાથમિક અહેવાલોમાં વાહનચાલકને ઊંઘની ઝોકું આવવાથી વાહન પરનો કાબૂ ગુમાવ્યો હોવાની આશંકા વ્યક્ત કરવામાં આવી છે. જોકે, અકસ્માતનું ચોક્કસ કારણ તપાસ બાદ જ સ્પષ્ટ થશે. હાલ આ બાબતને સત્તાવાર રીતે અંતિમ કારણ તરીકે સ્થાપિત કરવામાં આવી નથી. કોટાના વધારાના જિલ્લા કલેક્ટર રાજેશ જોશીએ જણાવ્યું હતું કે શંભુપુરા નજીક 16 મુસાફરોને લઈ જતું વાહન મધરાતે ટ્રક સાથે અથડાયું હતું. આ દુર્ઘટનામાં નવ લોકોએ જીવ ગુમાવ્યા છે. તમામ મુસાફરો ખાટુશ્યામજીનાં દર્શન કરીને મહારાષ્ટ્ર પરત ફરી રહ્યા હતા અને એક જ પરિવારના સભ્યો હતા. રાજેશ જોશીના જણાવ્યા અનુસાર, વહીવટી તંત્રની પ્રાથમિકતા ઘાયલોને યોગ્ય સારવાર ઉપલબ્ધ કરાવવાની છે. મૃતકોના મૃતદેહોના પોસ્ટમોર્ટમ સહિતની કાયદેસરની કાર્યવાહી પણ હાથ ધરવામાં આવી રહી છે.

જોધપુરમાં કાર અને ટેમ્પો વચ્ચે ટક્કર, ગુજરાતના એક જ પરિવારના 3નાં મોત

કોટાની દુર્ઘટનાની સાથે જોધપુરમાં પણ માર્ગ અકસ્માતની ગંભીર ઘટના સામે આવી છે. જોધપુરમાં કાર અને ટ્રાવેલ ટેમ્પો વચ્ચે થયેલી ટક્કરમાં ત્રણ લોકોનાં મોત થયાં છે, જ્યારે આશરે 15 લોકો ઘાયલ થયા છે. પ્રાથમિક માહિતી પ્રમાણે અકસ્માતનો ભોગ બનેલા તમામ લોકો ગુજરાતના બનાસકાંઠા જિલ્લાના એક જ પરિવારના સભ્યો હતા. તેઓ રામદેવરા ખાતે બાબા રામદેવનાં દર્શન કરીને ગુજરાત પરત ફરી રહ્યા હતા. અકસ્માત બાદ ઘાયલોને ચાર એમ્બ્યુલન્સની મદદથી જોધપુરની મથુરાદાસ માથુર હોસ્પિટલમાં પહોંચાડવામાં આવ્યા હતા. હોસ્પિટલમાં તબીબી ટીમ દ્વારા તેમની સારવાર શરૂ કરવામાં આવી હતી.

ત્રણ મહિલાઓ અને બાળકો પણ ઘાયલોમાં સામેલ

મથુરાદાસ માથુર હોસ્પિટલના અધિક્ષક વિકાસ રાજપુરોહિતે જણાવ્યું હતું કે હોસ્પિટલને સાંજે આશરે 7 વાગ્યે અકસ્માતની જાણ કરવામાં આવી હતી. માહિતી મળતાં જ ઘાયલોની સારવાર માટે જરૂરી વ્યવસ્થાઓ કરવામાં આવી હતી.

તેમના જણાવ્યા અનુસાર, ચાર એમ્બ્યુલન્સ દ્વારા આશરે 14થી 15 લોકોને હોસ્પિટલ લાવવામાં આવ્યા હતા. તેમાં ત્રણ મહિલાઓ અને ચાર બાળકોનો પણ સમાવેશ થાય છે. કેટલાક ઘાયલોને હાડકાંમાં ફ્રેક્ચર અને કરોડરજ્જુમાં ઈજાઓ થઈ હોવાનું જણાવાયું છે. એક વ્યક્તિને હોસ્પિટલ પહોંચાડવામાં આવ્યો ત્યારે મૃત જાહેર કરવામાં આવ્યો હતો. અન્ય ઘાયલોની સારવાર ચાલુ હતી.

બનાસકાંઠાના પરિવારની યાત્રા અધવચ્ચે અટકી

અકસાનમાં ઘાયલ થયેલા અનિલ નામના મુસાફરે જણાવ્યું હતું કે તેઓ ગુજરાતના બનાસકાંઠા જિલ્લાના રહેવાસી છે. પરિવારના આશરે 15થી 20 સભ્યો રામદેવરા દર્શન કરવા ગયા હતા. શનિવારે ઘરેથી નીકળ્યા બાદ રવિવારે સવારે દર્શન કરીને તેમણે ગુજરાત પરત ફરવાની યાત્રા શરૂ કરી હતી. અનિલે જણાવ્યું હતું કે તેઓ દાંતીવાડા સ્થિત BSF કોલોનીમાં રહે છે. દર્શન કર્યા બાદ ગુજરાત તરફ પાછા ફરવા નીકળ્યા હતા અને થોડા જ સમયમાં તેમનું વાહન અકસ્માતનો ભોગ બન્યું હતું. આ ઘટનામાં પરિવારના ત્રણ સભ્યોએ જીવ ગુમાવ્યા છે. હાલ મથુરાદાસ માથુર હોસ્પિટલમાં ઘાયલોની સારવાર ચાલી રહી છે. ઈજાઓની ગંભીરતાને ધ્યાનમાં રાખીને તબીબી ટીમો તેમની સ્થિતિ પર નજર રાખી રહી છે.

રાજસ્થાનમાં તીર્થયાત્રીઓની સુરક્ષા સામે ફરી સવાલ

એક જ દિવસે કોટા અને જોધપુરમાં બનેલી બંને દુર્ઘટનાઓએ તીર્થયાત્રાએ જતા અને પરત ફરતા પરિવારોની માર્ગસુરક્ષાનો મુદ્દો ફરી ચર્ચામાં લાવ્યો છે. બંને ઘટનાઓમાં પરિવારના સભ્યો સાથે મુસાફરી કરી રહ્યા હતા અને દર્શન પૂર્ણ કરીને ઘરે પરત ફરી રહ્યા હતા. કોટામાં ઊભેલા ટ્રક સાથે વાહનની ટક્કર થઈ હતી, જ્યારે જોધપુરમાં કાર અને ટેમ્પો વચ્ચે અથડામણ થઈ હતી. બંને અકસ્માતનાં ચોક્કસ કારણો અંગે તપાસની વિગતો હજી સામે આવવાની બાકી છે. ખાસ કરીને ગુજરાતમાંથી રામદેવરા અને રાજસ્થાનનાં અન્ય ધાર્મિક સ્થળોએ મોટી સંખ્યામાં શ્રદ્ધાળુઓ જતા હોય છે. આવા લાંબા પ્રવાસ દરમિયાન વાહનની સ્થિતિ, ડ્રાઇવરની પૂરતી ઊંઘ, સતત ડ્રાઇવિંગથી બચવું અને રસ્તા પર ઊભેલાં વાહનો અંગે સાવચેતી રાખવી અત્યંત જરૂરી છે. હાલ બંને અકસ્માતોમાં જીવ ગુમાવનારા લોકોના પરિવારોમાં શોકની લાગણી છે. ઘાયલો ઝડપથી સ્વસ્થ થાય તે માટે તેમના પરિવારજનો અને સ્થાનિક લોકો પ્રાર્થના કરી રહ્યા છે.


Related Posts

Load more
Follow Us

Live Cricket Score