ઈરાન પર હુમલો મારો જ નિર્ણયઃ ટ્રમ્પ:કુવૈત પર ઈરાની હુમલાથી ભડક્યાં ખાડી દેશો

ઈરાન પર હુમલો મારો જ નિર્ણયઃ ટ્રમ્પ:કુવૈત પર ઈરાની હુમલાથી ભડક્યાં ખાડી દેશો

ગલ્ફ કોઓપરેશન કાઉન્સિલ (GCC) એ બુધવારે કુવૈત અને બહેરીન પર થયેલા હુમલાઓને લઈને ઈરાનની સખત ટીકા કરી. સંગઠને આ હુમલાઓને કાયરતાપૂર્ણ ગણાવતા કહ્યું કે તેનાથી ક્ષેત્રમાં તણાવ વધુ વધ્યો છે.

GCCના મહાસચિવ જાસિમ મોહમ્મદ અલ્બુદૈવીએ કહ્યું કે ઈરાન સતત એવા પગલાં લઈ રહ્યું છે જે ગલ્ફ દેશોની સુરક્ષા, સ્થિરતા અને સાર્વભૌમત્વ માટે ખતરો છે.

તેમણે આરોપ લગાવ્યો કે ઈરાનના તાજેતરના હુમલા આંતરરાષ્ટ્રીય કાયદા, સંયુક્ત રાષ્ટ્રના નિયમો અને આંતરરાષ્ટ્રીય ધોરણોનું ઉલ્લંઘન છે. આવા પગલાંને રોકવા માટે આંતરરાષ્ટ્રીય સમુદાયે કડક વલણ અપનાવવું જોઈએ.

ગલ્ફ કોઓપરેશન કાઉન્સિલ એટલે કે GCCમાં કુવૈત, કતાર, સાઉદી અરેબિયા, બહેરીન, ઓમાન અને UAE શામેલ છે. જ્યારે, અમેરિકી રાષ્ટ્રપતિ ટ્રમ્પે કહ્યું કે ઈરાન વિરુદ્ધ કાર્યવાહીનો નિર્ણય તેમણે પોતે લીધો હતો.

તેમણે આ વાતનો ઇનકાર કર્યો કે ઇઝરાયલના વડાપ્રધાન બેન્જામિન નેતન્યાહુએ તેમને આવું કરવા માટે પ્રભાવિત કર્યા હતા. એક પોડકાસ્ટમાં વાતચીત દરમિયાન ટ્રમ્પે કહ્યું, કોઈએ મને ભ્રમિત કર્યો નથી. આ નિર્ણય મારો પોતાનો હતો.

છેલ્લા 24 કલાકના 5 મોટા અપડેટ્સ…

1. કુવૈત એરપોર્ટ પર ઈરાની ડ્રોન-મિસાઈલ હુમલો: હુમલામાં 1 ભારતીયનું મોત થયું, 63 લોકો ઘાયલ થયા. એરપોર્ટને નુકસાન થયું અને ફ્લાઈટ્સ અસ્થાયી રૂપે રોકવી પડી.

2. ઈરાને કુવૈત અને બહેરીનને ચેતવણી આપી: તેહરાને કહ્યું કે જો કોઈ દેશની જમીનનો ઉપયોગ ઈરાન પર હુમલા માટે થશે તો તે વળતો પ્રહાર કરશે.

3. ટ્રમ્પે કહ્યું- ઈરાને પરમાણુ હથિયારો ન બનાવવાની શરત સ્વીકારી: અમેરિકી રાષ્ટ્રપતિનો દાવો છે કે પ્રસ્તાવિત કરારમાં ઈરાન પરમાણુ બોમ્બ ન બનાવવાનું વચન આપશે.

4. નેતન્યાહુ પર ટ્રમ્પ ભડક્યા, ‘પાગલ’ સુધી કહ્યું: રિપોર્ટ અનુસાર લેબનોનમાં ઈઝરાયલી હુમલાઓ અને વધતા તણાવને લઈને ટ્રમ્પે નેતન્યાહુ પ્રત્યે નારાજગી વ્યક્ત કરી.

5. લેબનોનમાં ઈઝરાયલી સૈન્ય કાર્યવાહી તેજ: હિઝબુલ્લાહે 13 હુમલાઓનો દાવો કર્યો, જ્યારે ઈઝરાયલે ઘણા વિસ્તારો પર હવાઈ હુમલા કર્યા અને લોકોને ઘર ખાલી કરવાના આદેશ આપ્યા.