Related Posts
Category : Gujarat
અમદાવાદમાં કાળઝાળ ગરમીનું ઍલર્ટ, બે દિવસમાં તાપમાન 44 ડિગ્રીએ પહોંચવાની આશંકા
Ahmedabad Weather: અમદાવાદ સહિત સમગ્ર રાજ્યમાં ઉનાળાનો આકરો મિજાજ જોવા મળી રહ્યો છે. હવામાન વિભાગની આગાહી મુજબ, આગામી બે દિવસમાં અમદાવાદનું તાપમાન 44 ડિગ્રીને પાર કરી જાય તેવી પૂરેપૂરી સંભાવના છે. ગરમીના વધતા પ્રકોપને ધ્યાનમાં રાખીને શહેરમાં આગામી પાંચ દિવસ માટે ‘યલો ઍલર્ટ’ જાહેર કરવામાં આવ્યું છે.
અમદાવાદ રાજ્યનું સૌથી ગરમ શહેર
મળતી માહિતી અનુસાર, ગઈકાલે (સાતમી મે) અમદાવાદ 43.2 ડિગ્રી સેલ્સિયસ તાપમાન સાથે રાજ્યનું સૌથી ગરમ શહેર નોંધાયું હતું. સરેરાશ મહત્તમ તાપમાનમાં સામાન્ય કરતાં 1.7 ડિગ્રીનો વધારો જોવા મળ્યો છે. હવામાન વિભાગના આંકડા મુજબ, 10 મે સુધી તાપમાન 43 ડિગ્રીની આસપાસ રહેશે. 11મી અને12મી મેના રોજ પારો ઉછળીને 44 ડિગ્રીએ પહોંચવાની શક્યતા છે. જો કે, હવામાન નિષ્ણાતોના મતે વાસ્તવિક તાપમાન 44થી 45 ડિગ્રી સુધી પણ જઈ શકે છે, જે નાગરિકો માટે મુશ્કેલી સર્જી શકે છે.
રાજ્યના અન્ય શહેરોમાં પણ ગરમીનો પારો 40ને પાર
માત્ર અમદાવાદ જ નહીં, પરંતુ રાજ્યના અન્ય સાત મુખ્ય શહેરોમાં પણ તાપમાન 40 ડિગ્રીથી વધુ નોંધાયું છે. 7 મેના રોજ ગાંધીનગરમાં 43.0 ડિગ્રી, રાજકોટ, અમરેલી, ડીસા, વડોદરા, કંડલા અને ભુજમાં 40 ડિગ્રીથી વધુ તાપમાન વધુ નોંધાયું છે.
હવામાન વિભાગનું ‘યલો ઍલર્ટ’
હવામાન વિભાગે આગામી ત્રણ દિવસ માટે અને ત્યારબાદના બે દિવસ માટે સતત યલો એલર્ટ જાહેર કર્યું છે. આનો અર્થ એ છે કે હીટવેવની સ્થિતિ યથાવત રહેશે અને બપોરના સમયે ગરમ પવનો (લૂ) ફૂંકાશે.
Load more
