આજથી રાજ્યની 17 હજાર સસ્તા અનાજની દુકાનોને તાળા: રેશન ડીલરો હડતાળ પર, જાણો લોકોને અનાજ ક્યારે મળશે?

Gujarat ration shop strike: ગુજરાત રાજ્યની આશરે 17,000 થી વધુ સસ્તા અનાજની દુકાનોના સંચાલકો (રેશન ડીલરો) તેમની લાંબા સમયથી પડતર 20 મુખ્ય માંગણીઓ ન સંતોષાતા 1 નવેમ્બર, 2025 થી અસહકાર આંદોલન અને વિતરણ પ્રક્રિયાથી અળગા રહેવાની જાહેરાત કરી છે. ગુજરાતની બે મુખ્ય સંસ્થાઓ – ગુજરાત રાજય ફેર પ્રાઈઝ શોપ & કેરોસીન લાઈસન્સ હોલ્ડર્સ એસોસીએશન અને ઓલ ગુજરાત ફેર પ્રાઈઝ શોપ એસોસીએશન (GSFPSA) – દ્વારા આ હડતાળનું એલાન આપવામાં આવ્યું છે. તેમની મુખ્ય માંગણીઓમાં કમિશન પ્રતિ કિલોએ ₹3 કરવું (હાલમાં ₹1.50) અને મિનિમમ માસિક કમિશન ₹40,000 કરવું, તેમજ પરિવારના સભ્યને ઈ-પ્રોફાઈલ માં ઉમેરીને તેમના બાયોમેટ્રિકથી લોગીન કરવાની વ્યવસ્થા આપવાનો સમાવેશ થાય છે. આ હડતાળના કારણે નવેમ્બર મહિનામાં ગરીબ અને જરૂરિયાતમંદ પરિવારોને અનાજ વિતરણમાં ગંભીર સમસ્યા ઊભી થઈ શકે છે.

રેશન ડીલરો દ્વારા અસહકાર આંદોલનની જાહેરાત

ગુજરાત રાજ્યના આશરે 17 હજાર થી વધુ સસ્તા અનાજની દુકાનોના સંચાલકોએ તેમની પડતર માંગણીઓના નિરાકરણ માટે સરકાર સામે બાયો ચડાવી છે. ગુજરાત રાજય ફેર પ્રાઈઝ શોપ & કેરોસીન લાઈસન્સ હોલ્ડર્સ એસોસીએશન અને ઓલ ગુજરાત ફેર પ્રાઈઝ શોપ એસોસીએશન (GSFPSA) દ્વારા આ આંદોલનની સંયુક્ત જાહેરાત કરવામાં આવી છે. આ નિર્ણય મુજબ, રેશન ડીલરો નવેમ્બર-2025 માસ માટે જથ્થાના ચલન નહીં ભરે અને 1 નવેમ્બર, 2025 થી વિતરણ પ્રક્રિયાથી સંપૂર્ણપણે અળગા રહીને અસહકારનું આંદોલન શરૂ કરશે. આ અંગેની જાણ સત્તાવાર રીતે પુરવઠા મંત્રી અને સંબંધિત સચિવ/નિયામકને લેખિતમાં કરવામાં આવી છે.

મુખ્ય 20 માંગણીઓમાંથી કમિશનમાં વધારો સર્વોચ્ચ

એસોસિએશનો દ્વારા કુલ 20 મુખ્ય માંગણીઓ રજૂ કરવામાં આવી છે, જેના પર સરકાર તરફથી કોઈ લેખિત કે મૌખિક પ્રતિસાદ ન મળતાં હડતાળનું પગલું ભરવાની ફરજ પડી છે. આ તમામ માંગણીઓમાં સૌથી અગ્રણી માંગણી કમિશન વધારવાની છે.

કમિશન વધારો: ડીલરોની મુખ્ય માંગ છે કે વર્તમાન મોંઘવારીને ધ્યાનમાં રાખીને પ્રતિ કિલોએ કમિશનની રકમ ₹1.50 ના બદલે વધારીને ₹3 કરવામાં આવે.
મિનિમમ કમિશન: આ સાથે, માસિક ધોરણે અપાતું ઓછામાં ઓછું કમિશન (Minimum Commission) ₹20,000 થી વધારીને ₹40,000 કરવામાં આવે અને તેમાં દર વર્ષે 10% નો નિયમિત વધારો આપવામાં આવે.

ઈ-પ્રોફાઈલ અને વારસાઈ જોગવાઈઓમાં સુધારો

ટેક્નોલોજી અને સંચાલન સંબંધિત પણ ડીલરોએ મહત્ત્વની માંગણીઓ મૂકી છે, જે તેમના રોજિંદા કામકાજને સરળ બનાવશે.

ઈ-પ્રોફાઈલમાં સહાયક: રેશન ડીલરની ઈ-પ્રોફાઈલમાં તેમના પરિવારના સભ્ય કે સહાયકને ઉમેરવાની અને તેમના બાયોમેટ્રિકથી લોગીન થઈ શકે તેવી વ્યવસ્થા શરૂ કરવી. આનાથી દુકાનદારની ગેરહાજરીમાં પણ વિતરણ પ્રક્રિયા ચાલુ રાખી શકાય.
વારસાઈ પુનઃસ્થાપિત: રેશન ડીલરોની હયાતીમાં કે ત્યારબાદ બીજી વારસાઈ કરવાની જાહેર હિસાબ સમિતિએ જે જોગવાઈ સ્થગિત કરી છે, તેને પુનઃ ચાલુ કરવી.

વિતરણ અને તપાસ સંબંધિત મહત્ત્વની માંગણીઓ

રેશન ડીલરોએ માલની ઘટ અને સરકારી તપાસ સંબંધિત સમસ્યાઓનો વ્યવહારિક ઉકેલ લાવવાની માંગ કરી છે.

માલ ઘટનો ઉકેલ: દુકાન સુધીના વિતરણમાં થતી માલ ઘટ (જેમ કે વેરણ ઘટ, જથ્થો સુકાઈ જવાની ઘટ વગેરે) સામે યોગ્ય અને સર્વમાન્ય વ્યવહારિક ઉકેલ લાવવો.
સરકારી તપાસના નિયમો: તપાસણીના બહાને ખોટી હેરાનગતિ અને ખોટા કેસો કરીને દંડનીય કાર્યવાહીની પ્રથામાં સુધારો કરવો. ફરિયાદ કે જરૂરિયાત જણાય તો જ કેસ કરવાની નીતિ બનાવવી.
કોન્ટ્રાક્ટર અને સર્વર: કોન્ટ્રાક્ટર સમયસર અનાજનો જથ્થો દુકાન સુધી પહોંચાડે તેવી વ્યવસ્થા સુનિશ્ચિત કરવી, અને સર્વર ડાઉન હોય તેની જાણ ગ્રાહકોને પણ કરવાની વ્યવસ્થા ઊભી કરવી.

અન્ય ટેકનિકલ અને વહીવટી માંગણીઓ

ડીલરોએ કેટલીક અન્ય ટેકનિકલ અને વહીવટી માંગણીઓ પણ કરી છે, જેમાં તાજેતરના પરિપત્રનો વિરોધ મુખ્ય છે.

પરિપત્ર રદ કરવો: દુકાન પર જથ્થો મળ્યા બાદ 80% સભ્યોના બાયોમેટ્રિક વેરિફિકેશન લેવા અંગેના તા. 15/10/2025 ના ઠરાવને તાત્કાલિક રદ કરવાની માંગણી કરવામાં આવી છે.
કમિશનની અનિયમિતતા દૂર કરવી: કમિશન સમયસર અને એકસાથે બેન્ક એકાઉન્ટમાં જમા થાય તથા ઈ-પાસબુકમાં અપડેટ થાય તે માટે સોફ્ટવેરમાં સુધારો કરવો.
મેન્યુઅલ રેકર્ડ: મેન્યુઅલ રેકર્ડ રજીસ્ટર ફરજિયાત રાખવાના ઠરાવમાં સુધારો કરીને તેને મરજીયાત કરવો.

સરકાર પર જવાબદારી અને તાત્કાલિક નિર્ણયની અપેક્ષા

એસોસિએશને તંત્રને સ્પષ્ટ સંદેશ આપ્યો છે કે જો તેમની વાજબી માંગણીઓ સંતોષવામાં નહીં આવે, તો ના છૂટકે ગાંધી ચિંધ્યા માર્ગે આંદોલન કરવાની ફરજ પડશે અને તેનાથી રાજ્યમાં ઊભી થતી તમામ જવાબદારી સંબંધિત વિભાગની રહેશે. ગુજરાત રાજય ફેર પ્રાઈઝ શોપ & કેરોસીન લાઈસન્સ હોલ્ડર્સ એસોસીએશનના પ્રમુખ પ્રહલાદભાઈ મોદી અને ઓલ ગુજરાત ફેર પ્રાઈઝ શોપ એસોસીએશનના પ્રમુખ રાજેન્દ્રસિંહ જાડેજા સહિતના મહત્ત્વના હોદ્દેદારોએ આ આવેદનપત્ર પર સહી કરીને સરકાર તાત્કાલિક નિર્ણય લે તેવી આશા વ્યક્ત કરી છે, જેથી ગરીબ ગ્રાહકોને અનાજ મેળવવામાં મુશ્કેલી ન પડે.