Related Posts
Category : Gujarat
મોંઘવારીનો ઝટકો, ગુજરાતમાં ઓટોરિક્ષાના ભાડા વધ્યાં, રાજ્ય સરકારે પણ મંજૂરી આપી
Gujarat Autorickshaw Fares : ગુજરાત સરકારના ટ્રાન્સપોર્ટ વિભાગ દ્વારા સમગ્ર રાજ્યમાં ઓટોરિક્ષાના ભાડામાં મહત્ત્વપૂર્ણ સુધારો જાહેર કરવામાં આવ્યો છે. આ અંગેનું નવું અધિકૃત જાહેરનામું અમલમાં આવી ગયું છે. જેનાથી રાજ્યના રિક્ષા ચાલકો અને સામાન્ય મુસાફરો બંને માટે નવા ભાડા દરો નક્કી કરવામાં આવ્યા છે. નવા નિયમ મુજબ પ્રથમ 1.2 કિમી માટે રૂ. 25 અને ત્યારબાદ પ્રતિ 200 મીટરે રૂ. 4 લેવાશે. આજથી રાજ્યમાં રિક્ષા ચાલકો અને મુસાફરો માટે આ નવો ભાડા વધારો સત્તાવાર રીતે લાગુ કરી દેવામાં આવ્યો છે. જેનાથી દૈનિક મુસાફરી પર સીધી અસર જોવા મળશે.
ન્યૂનતમ ભાડું અને અંતર મુજબ વધારાના ચાર્જની વિગતો
સરકાર દ્વારા બહાર પડાયેલા નવા જાહેરનામા મુજબ શહેરી વિસ્તારોમાં ઓટોરિક્ષાનું ન્યૂનતમ ભાડું રૂ. 25 નક્કી કરાયું છે. જે પ્રથમ 1.2 કિલોમીટરના અંતર માટે માન્ય રહેશે. આ પ્રારંભિક મર્યાદા પૂરી થયા પછી પ્રત્યેક 200 મીટરના અંતર માટે મુસાફરોએ વધારાના રૂ. 4 ચૂકવવા પડશે. આ ફેરફારથી રોજબરોજ અપડાઉન કરતા નાગરિકો પર આર્થિક ભાર વધશે, પરંતુ બીજી તરફ સીએનજી અને પેટ્રોલના સતત વધતા ભાવો સામે રિક્ષા ચાલકોની લાંબા સમયથી ભાડુ વધારવાની માગણી હતી.
રાત્રિના સમયે મુસાફરી કરતા નાગરિકો માટે ખાસ નાઈટ ચાર્જ પણ લાગુ કરવામાં આવ્યો છે. જો કોઈ મુસાફર રાત્રે 11 વાગ્યાથી સવારના 5 વાગ્યા વચ્ચે ઓટોરિક્ષામાં સફર કરે છે, તો તેને નિયત ભાડા પર 50% વધારાનો નાઈટ ચાર્જ ચૂકવવો પડશે. આ ઉપરાંત, આ નવા જાહેરનામામાં મુસાફર દ્વારા રિક્ષાને લાંબો સમય ઊભી રખાવવા પર લાગતા વેઇટિંગ ચાર્જ અંગેની સ્પષ્ટ જોગવાઈનો પણ સમાવેશ કરવામાં આવ્યો છે. જે ડ્રાઈવર અને મુસાફર વચ્ચે ભાડા બાબતે થતા વિવાદોને અટકાવવામાં મદદરૂપ સાબિત થશે.
રિક્ષા ચાલક સંગઠનો દ્વારા નિર્ણયનું સકારાત્મક સ્વાગત
સરકારના આ મહત્ત્વપૂર્ણ નિર્ણયને રાજ્યના વિવિધ રિક્ષા ચાલક યુનિયનોએ હકારાત્મક રીતે આવકાર્યો છે. ઓટો ડ્રાઈવર વેલ્ફેર એસોસિએશન સહિતના અગ્રણી સંગઠનોએ તેને સમર્થન આપ્યું છે. સંગઠનોનું માનવું છે કે મોંઘવારીના આ યુગમાં આ ભાડા વધારો અત્યંત જરૂરી હતો. સાથે જ તમામ રિક્ષા ચાલકોને કડક સૂચના અપાઈ છે કે તેઓ પોતાના વાહનમાં નવું ભાડાપત્રક ફરજિયાત પ્રદર્શિત કરે અને મુસાફરો સાથે હંમેશા નમ્ર તથા શિષ્ટ વ્યવહાર જાળવી રાખે જેથી સેવાની ગુણવત્તા જળવાઈ રહે.
Load more
