ગુજરાત હવામાન વિભાગના અહેવાલ પ્રમાણે રાજ્યમાં આગામી 48 કલાકમાં તાપમાનમાં બેથી ત્રણ ડિગ્રીનો વધારો થઈ શકે છે. આ સિવાય કોઈ મોટો ફેરફાર થવાની સંભાવના નથી. રાજ્યમાં આગામી 28 માર્ચ સુધી વરસાદની કોઈ સંભાવના નથી.
હવામાન નિષ્ણાંત અંબાલાલ પટેલે જણાવ્યુ કે દેશના ઉત્તરીય પર્વતીય વિસ્તારોમાં હિમવર્ષાની સંભાવના રહેશે. ગુજરાતમાં ફરી વાદળછાયું વાતાવરણ જોવા મળશે. ગુજરાતમાં રાજસ્થાનના સરહદી ભાગ ઉત્તર ગુજરાત, મધ્ય ગુજરાત અને કચ્છમાં કેટલીક જગ્યાએ હળવો વરસાદ પડી શકે છે.
નવી આગાહી પ્રમાણે રાજ્યમાં 29 માર્ચથી એપ્રિલની શરૂઆતમાં વાતાવરણમાં પલટો આવી શકે છે. આ દરમિયાન 40-50 કિમીની ઝડપે પવન ફૂંકાશે. અંબાલાલે આપેલી માહિતી પ્રમાણે એપ્રિલના બીજા સપ્તાહમાં પણ વાતાવરણમાં પલટો આવશે.
અંબાલાલ પટેલની આગાહી પ્રમાણે એપ્રિલ મહિનામાં વરસાદની સંભાવના રહેશે. આ દરમિયાન પ્રી મોનસૂન એક્ટિવિટી જેવો માહોલ જોવા મળી શકે છે અને કરા પડી શકે છે. તો 20 એપ્રિલથી જૂનની શરૂઆતમાં બંગાળના ઉપસાગરમાં એક વાવાઝોડું આવવાની પણ સંભાવના છે.
