Related Posts
Category : Gujarat
‘ભાજપના સ્થાનિક નેતાઓએ જ ચૈતર વસાવાને ચૂંટણીમાં જીતાડ્યો…’, સાંસદ મનસુખ વસાવાએ પક્ષની પોલ ખોલી
BJP MP Mansukh Vasava Accuses Local Leaders: ભાજપ સાંસદ મનસુખ વસાવાએ ફરી એકવાર પોતાની જ પક્ષના નેતાઓ અને વહીવટી તંત્ર સામે મોરચો ખોલ્યો છે. રાજપીપળા ખાતે યોજાયેલા સંગઠન કાર્યક્રમ દરમિયાન વસાવાએ જાહેર મંચ પરથી જ એવો આક્ષેપ કર્યો કે, ‘દેડિયાપાડા વિધાનસભા બેઠક પર આપના ધારાસભ્ય ચૈતર વસાવાને જીતાડવામાં ભાજપના જ સ્થાનિક આગેવાનો અને હોદ્દેદારોનો હાથ હતો. એટલું જ નહીં, આપના ઉમેદવાર જ્યારે અંબાજી રથયાત્રા લઈને નીકળ્યા ત્યારે ભાજપના જ હોદ્દેદારોએ જ સન્માન કરવા પહોંચી ગયા હતા.’
‘ભાજપના નેતાઓ તલાટીને હપ્તા આપે છે એટલે નગરપાલિકામાં નબળી ગુણવત્તાના કામો થાય’
ભરૂચના સાંસદ મનસુખ વસાવાએ જાહેરમાં સ્પષ્ટ કર્યું કે, ‘ભાજપમાં રહીને વિરોધ પક્ષોને મદદ કરનારાઓને સાંખી લેવામાં નહીં આવે, જો કોઈને ખોટું લાગતું હોય તો તે પક્ષ છોડી શકે છે. પક્ષમાં રહીને આપવાળા સાથે દોસ્તી રાખશો તો પણ ભવિષ્યમાં ક્યારેય સફળ થવાશે નહીં.’
તેમણે પક્ષની આંતરિક શિસ્તની સાથે વહીવટી સ્તરે ચાલતા ભ્રષ્ટાચારની પોલ પણ ખોલી નાખી હતી. સાંસદ મનસુખ વસાવાએ આરોપ લગાવ્યો હતો કે, ‘સત્તા પર બેઠેલાં ભાજપના કેટલાક આગેવાનો તલાટીઓને હપ્તા આપે છે. આ હપ્તાખોરી અને કમિશનને કારણે જ ગ્રામ્ય વિસ્તારો અને નગરપાલિકામાં ગુણવત્તા વિનાના વિકાસના કામો થઈ રહ્યાં છે. નબળા અને લોલંલોલ કામોને કારણે જ વિપક્ષોને સરકાર સામે અવાજ ઉઠાવવાની અને રાજકીય મુદ્દો બનાવવાની સીધી તક મળી જાય છે.’
ચેતવણી આપતા મનસુખ વસાવા કહ્યું હતું કે, ‘સરકારી કામ ભલે ભાજપના કાર્યકરો રાખે, પરંતુ કામની ક્વોલિટી જાળવવી અનિવાર્ય છે. પક્ષના જ મંચ પરથી સાંસદના આ રાજકીય પ્રહારોને પગલે સ્થાનિક રાજકારણમાં ગરમાવો આવ્યો છે.’
Load more
