Immediately Depart : અમેરિકા અને ઈઝરાયેલ દ્વારા ઈરાન પર કરવામાં આવેલા હુમલાઓ વચ્ચે, યુએસ સ્ટેટ ડિપાર્ટમેન્ટે સોમવારે અમેરિકન નાગરિકોને સાઉદી અરેબિયા અને સંયુક્ત આરબ અમીરાત (UAE) સહિત મધ્ય-પૂર્વના એક ડઝનથી વધુ દેશો તાત્કાલિક છોડી દેવા અપીલ કરી છે. સ્ટેટ ડિપાર્ટમેન્ટના કોન્સ્યુલર અફેર્સના આસિસ્ટન્ટ સેક્રેટરી મોરા નામદારે જણાવ્યું હતું કે, સુરક્ષા જોખમોને ધ્યાનમાં રાખીને યુએસ નાગરિકોએ ઉપલબ્ધ વ્યાપારી પરિવહન (commercial transportation) દ્વારા આ દેશો છોડી દેવા માટેની ભલામણ કરવામાં આવે છે.
કયા દેશો માટે એડવાઈઝરી?
આ ચેતવણી બહેરીન, ઇજિપ્ત, ઈરાન, ઇરાક, ઈઝરાયેલ, વેસ્ટ બેંક અને ગાઝા, જોર્ડન, કુવૈત, લેબનોન, ઓમાન, કતાર, સાઉદી અરેબિયા, સીરિયા, યુએઈ અને યમન જેવા દેશોને લાગુ પડે છે.
દૂતાવાસ ખાલી કરાયા: જોર્ડનના અમ્માનમાં સ્થિત યુએસ એમ્બેસીએ સોમવારે વહેલી સવારે જાહેરાત કરી હતી કે ધમકીને કારણે તેમના કર્મચારીઓ ત્યાંથી રવાના થઈ ગયા છે.
યુદ્ધની સ્થિતિ: શનિવારે અમેરિકા અને ઈઝરાયેલે ઈરાનમાં વિવિધ લક્ષ્યો પર હુમલા કર્યા હતા. જેમાં સુપ્રીમ લીડર આયાતુલ્લા અલી ખમેની સહિત ઘણા ટોચના અધિકારીઓ માર્યા ગયા છે. જવાબમાં તેહરાને પણ આ પ્રદેશમાં અમેરિકા અને ઈઝરાયેલના મથકો પર હુમલા કર્યા છે.
કટોકટી ટાસ્ક ફોર્સ: પરિસ્થિતિને સંભાળવા અને સંઘર્ષના પ્રતિભાવ માટે અમેરિકાએ આંતર-એજન્સી ઇમરજન્સી ટાસ્ક ફોર્સ સક્રિય કરી છે.
ઉર્જા સંકટ અને ભાવમાં વધારો
આ સંઘર્ષને કારણે વૈશ્વિક સ્તરે ઉર્જાના ભાવમાં ઉછાળો આવ્યો છે. ઈરાની અધિકારીઓએ વિશ્વના તેલ પુરવઠા માટેના મુખ્ય માર્ગ એવા ‘સ્ટ્રેટ ઓફ હોર્મુઝ’ માંથી પસાર થતા કોઈપણ જહાજ પર હુમલો કરવાની ધમકી આપી છે.
અમેરિકી રાષ્ટ્રપતિ ડોનાલ્ડ ટ્રમ્પે સોમવારે જણાવ્યું હતું કે, આ સંઘર્ષ 4 થી 5 અઠવાડિયા સુધી ચાલવાની ધારણા હતી, પરંતુ તે વધુ લાંબો પણ ખેંચાઈ શકે છે. વધતી જતી ઉર્જા કિંમતોને અંકુશમાં લેવા માટે યુએસ ટ્રેઝરી સેક્રેટરી સ્કોટ બેસેન્ટ અને એનર્જી સેક્રેટરી ક્રિસ રાઈટ મંગળવારે મહત્વના પગલાં જાહેર કરે તેવી શક્યતા છે.
