ટીમ ઇન્ડિયાના હેડ કોચની જવાબદાીરી સંભાળશે VVS. LAXMAN

ટીમ ઇન્ડિયાના હેડ કોચની જવાબદાીરી સંભાળશે VVS. LAXMAN

ભારતીય ક્રિકેટ ટીમ હાલમાં વેસ્ટ ઈન્ડિઝ સામે મેચ રમવામાં વ્યસ્ત છે. વેસ્ટ ઈન્ડિઝનો પ્રવાસ ખતમ થયા બાદ ટીમ ઈન્ડિયાએ આયર્લેન્ડ જવાનું છે, ભારતે આયર્લેન્ડ પ્રવાસ પર ત્રણ મેચની T20 શ્રેણી રમવાની છે. આ T20 મેચ 18, 20 અને 23 ઓગસ્ટના રોજ ડબલિનમાં રમાશે. હવે આયર્લેન્ડ પ્રવાસને લઈને એક મોટા સમાચાર સામે આવી રહ્યા છે.ક્રિકબઝના રિપોર્ટ અનુસાર, નેશનલ ક્રિકેટ એકેડમી (NCA)ના ચીફ વીવીએસ લક્ષ્મણ આયરલેન્ડના પ્રવાસ પર ભારતીય ટીમના મુખ્ય કોચ હશે. જ્યારે રેગ્યુલર હેડ કોચ રાહુલ દ્રવિડ અને તેના સાથી સપોર્ટ સ્ટાફ વિક્રમ રાઠોડ (બેટિંગ કોચ), પારસ મ્હામ્બ્રે (બોલિંગ કોચ)ને આગામી એશિયા કપ અને ODI વર્લ્ડ કપને ધ્યાનમાં રાખીને આરામ આપવામાં આવશે.

આયર્લેન્ડ પ્રવાસ પર સિતાંશુ કોટક અને હૃષીકેશ કાનિટકરમાંથી કોઈ એકને બેટિંગ કોચની જવાબદારી મળી શકે છે. તે જ સમયે, સાઈરાજ બહુતુલે અને ટ્રોય કુલીમાંથી કોઈ એક બોલિંગ કોચની ભૂમિકા ભજવી શકે છે. તમને જણાવી દઈએ કે વીવીએસ લક્ષ્મણ ગયા વર્ષે આયર્લેન્ડ અને ન્યુઝીલેન્ડના પ્રવાસમાં પણ રાહુલ દ્રવિડની ગેરહાજરીમાં મુખ્ય કોચની ભૂમિકામાં જોવા મળ્યો હતો.આયર્લેન્ડ સામેની ટી20 સીરીઝ માટેની ટીમની હજુ જાહેરાત કરવામાં આવી નથી, પરંતુ આશા છે કે માત્ર હાર્દિક પંડ્યા જ ટીમનું નેતૃત્વ કરશે. મુખ્ય પસંદગીકાર અજીત અગરકરની દ્રવિડ અને નિયમિત કેપ્ટન રોહિત શર્મા સાથેની વાતચીત બાદ ટીમની પસંદગી થઈ શકે છે. એવું અપેક્ષિત છે કે અગરકર વેસ્ટ ઈન્ડિઝ સામેની બીજી ટેસ્ટ દરમિયાન ભારતીય ટીમ સાથે જોડાઈ શકે છે. પસંદગી સમિતિના સભ્ય સલિલ અંકોલા પહેલાથી જ ટીમ સાથે છે.

જસપ્રીત બુમરાહની આયર્લેન્ડ શ્રેણી માટે ટીમમાં પસંદગી થવાની આશા છે. ફાસ્ટ બોલરે પ્રેક્ટિસ શરૂ કરી દીધી છે અને તે નિયમિતપણે નેટ્સ પર 8-10 ઓવર બોલિંગ કરી રહ્યો છે. જોકે, શ્રેયસ અય્યર આયર્લેન્ડ શ્રેણી માટે ઉપલબ્ધ રહેશે તેની કોઈ ખાતરી નથી. હા, કેએલ રાહુલ આયર્લેન્ડ પ્રવાસ માટે ફિટ થવાની કોઈ શક્યતા નથી. રાહુલ હાલમાં NCAમાં રિહેબ હેઠળ છે અને તેણે હજુ સુધી બેટિંગ પ્રેક્ટિસ પણ શરૂ કરી નથી.બીજી તરફ એશિયા કપ 2023નું શિડ્યુલ ટૂંક સમયમાં જાહેર થવાની આશા છે. એશિયન ક્રિકેટ કાઉન્સિલ (ACC) એ ગયા મહિને જાહેરાત કરી હતી કે એશિયા કપ 2023 પાકિસ્તાન અને શ્રીલંકામાં રમાશે. આ પ્રવાસ દરમિયાન પાકિસ્તાનમાં ચાર મેચ અને શ્રીલંકાની ધરતી પર નવ મેચ રમાશે. શ્રીલંકામાં એશિયા કપની મેચો કેન્ડી અને દામ્બુલામાં યોજાઈ શકે છે. બીજી તરફ પાકિસ્તાનના લાહોરનું ગદ્દાફી સ્ટેડિયમ ચાર મેચોની યજમાની કરી શકે છે. એશિયા કપ 31 ઓગસ્ટથી 17 સપ્ટેમ્બર સુધી રમાશે.